İşğal etilgen Qırımda yañı oquv yılı, elektrik kesilüvlerine baqmadan, tam ziyaretli derslernen, em de qısqartılğan dersler, sıcaq üyle yemekleri yerine mahsus rejimde quru aş ve ralelerden başlap arbiy azırlıqnıñ kirsetilgeninen başlay. Ana-babalar şaşqın, mütehassıslar ise quvetleştirilgen teşviqat ve tasilniñ arbiyleştirilmesi aqqında tenbiyeleyler. İşğal etilgen yarımadada yañı oquv yılına nasıl azırlanğanları — Suspilne Qırım jurnalistleri ögreneler.
«Vaqtınca işğal etilgen Qırımnıñ mektep balaları içün yañı oquv yılı muayyensizlikten başlay. Bunıñ sebebi, afu etiñiz, anekdotiktir. Olar aytqanlar ki, tam ziyaretli oquv keçirilmeycek, çünki olar normal internet alâqasını temin etalmaylar. Afu etiñiz, bu şaşırtıcı», — dedi «Almenda» ictimaiy tasil merkeziniñ analitigi Oleğ Ohredko.
İşğalciler, elektrik kesilüvleri sebebinden derslerniñ devamlılığını 30 daqqağa qadar qısqartmağa, umumen ise balanıñ mektepte bulunma müddetini dört saatke qadar sıñırlandırmağa planlaştırğanlarını bildirdiler.
Ana-babalar haberlerge deñişmelerden şaşqınlar, bu aqqında olar ictimaiy ağlarda yazalar:
«Yani kovid oldı, er kes evde otura edi ve iç bir deşetli şey olmadı, bir şekilde oquy ediler... Ve şimdi böyle qıyın ve telükeli vaziyette, kerçekten uzaqtan oquvğa keçmek mümkün degilmi?», «Men sizn añlayalmayım. Eger şimdi uzaqtan oquv olsa, er kes öfkelenir edi, çalışqan ana-babalar balalarını ne yerge qoyacaqlar dep. Tam ziyaretli oquv olacağını bildirdiler — yine de razı degiller», «Tasilniñ semereliligi — bu yahşı. Amma telükesizlik nasıl olacaq?»
Rusiye teşviqatçı medialarında işğal etilgen Qırım ve Sevastopol (Aqyar) mektepleriniñ yañı oquv yılına azırlığı tekşerilgeni köstirildi. Hususan, sığınaqlarnıñ bar-yoqlığına baqtılar. Aynı zamanda Ukrayina Prezidentiniñ Qırım Muhtar Cumhuriyetindeki Temsilcligi ayta ki, işğalli akimiyet mekteplerniñ telükesizligi aqqında ğaylanmadı.
«Olarnıñ aytqanları — bu daa ziyade körüniş içündir. Mekteplerde olar 2023 senesi, ilk telüke dalğası olğanda, bunı yapqanlarını bildirdiler edi, amma kerçekten iç bir şey deñişmedi. Kütleviy haber vastaları içün böyle bir körüniş kelecekte de yoq olmaycaq. Bundan ğayrı, olar şimdi mekteplerden şartlı sığınaqlar yaratmasını talep eteler, meselâ balalarnıñ mektepke ketken yolundaki turaqlarda betondan yasalğan sığınaqlar. Ve bu mesele red etile ve baqılmay, bu de ana-babalar arasında belli bir memnüniyetsizlikni doğura», — dedi Ukrayina Prezidentiniñ Qırım Muhtar Cumhuriyetindeki Daimiy Temsilcisiniñ muavini Denıs Çıstikov.
Onıñ sözlerine köre, Qırımda bu sene birinci sınıf oquvcılarınıñ sayısı ciddiy derecede azaldı — olar 19 biñdir. Bu, 2022 senesindekinden 6 biñ az. Sevastopolda (Aqyarda) bu raqam eki kereden ziyade azdı — 2 300 balağa qadar.
Mütehassısnıñ sözlerine köre, işğal etilgen Qırımda mektep balalarınıñ beyinlerini yuvmaqqa endi işğal başından berli tutundılar. RFnıñ Ukrayinağa qarşı tolu miqyaslı istilâsından soñ teşviqat daa da quvetleştirildi: Pazartesi künleri Rusiye gimni ve «üç renkli bayraq»nıñ kötrilmesi, aftalıq «Müim şeyler aqqında laf» dersleri. Şimdi ise, quvetleştirilgen arbiy azırlıqtan ğayrı, Qırım mekteplerinde yañı toplamlar açılmaqta: robototehnika ve dronlarnı idare etüv boyunca.
Ukrayina Prezidentiniñ Qırımdaki Temsilcligi ana-babalarğa işğalli akimiyetke ümüt bağlamamağa, balalarnıñ telükesizligini öz başına temin etmege tevsiye ete. Ve hatırlata ki, işğal şaraitinde de mektep balaları mesafeden ukrayin tasilini ala bileler.
Mektep sayısınıñ eksilüvi, mektep formalarına olğan talapnıñ eksilüvi, kiyim, eşya ve ofis imalatçılarınıñ şikâyetini doğura.
Aslında kitapçıqlar ve çeşit kâğıtlarnı satın almağa az azırlanalar, çünki ana-babalar bir de bir ögrenüv olacağına, balalar çıqacağına inanmaylar. Bu resim yaratılğanını aytalar, amma bu ilk aftalar içün, soñra balalar onlayn tasil almağa başlaycaqlar. Onıñ içün böyle bir areket yoq ve biznes şikâyet ete ki, olar azırlana ediler, amma beklegen alış-verişleri olmadı«, - dep añlattı Çistikov.
Bundan da ğayrı, işğalciler Qırım mektepleriniñ derslerine yañı fenlerni qoşalar: beşinci sınıf talebeleri Rusiye maneviy-ahlâqiy medeniyetini ögrenecekler. Oleg Ohredkonıñ aytqanına köre, tarihiy derslikler kene deñiştirile, qırımlılarnı kelecekte cenkleşmege mektep kurslarından azırlaycaqlar - mecburiy arbiy azırlıq derslerinde. Tarih dersleri de buña köre saatlarnı arttıra.
«Yunarmiya»da azırlıq körgen balalar lagerlerde azırlıq kördi, «yaş asker mektebinde» tasil aldı. Bu, yemin etmek içün askerler alğan azırlıq şeklidir. Olar onı keçti, olar azır: ateş ete bilirler, silânı nasıl qullanmaq kerek olğanını bileler, tibbiy talimat aldılar, emirlerni bileler. Eñ esası - olar endi emirlerni yerine ketirmege azır. Şunıñ içün esas yöneliş - balalarnı arbiy hızmetke azırlamaq. 18 yaşını toldurğan soñ - olar endi işğalci orduğa, cebege ketmege azırlar», - dep bildire «Almendı» analitik.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
