Üç sene evel, 2023 senesi arman ayınıñ 24-nde, ukrayin istihbaratçıları işğal etilgen Qırımğa qondılar ve yarımadada ukrayin bayrağını kötrdiler. Bu mahsus operatsiya «Timur mahsus bölügi» arbiy hızmetçileri içün zararsız keçti.
2026 senesi arman ayınıñ 24-nde Ukrayina Mudafaa nazirliginiñ Baş İstihbarat İdaresi bunı hatırlattı ve mahsus operatsiyanıñ videosını YouTubede neşir etti.
«Müstaqillik künü Ukrayina Mudafaa nazirliginiñ Baş İstihbarat İdaresiniñ "Timur mahsus bölügi" arbiy hızmetçileri Qara deñizni keçtiler, işğal etilgen yarımadanıñ yalısına çıqtılar, ruslarnen cenkke kirdiler ve qoyulğan vazifeni zararsız yerine ketirdiler. O künü Qırımda yañıdan ukrayin bayrağı köterildi. Bu operatsiya bir hatırlatuv oldı: işğalniñ tahminen on yılı Qırımnı Rusiye yapmadı, aramızdaki deñiz ise onı bizge irişilmez yapmadı», — dep qayd etildi haberde.
2023 senesi Qırımda ukrayin arbiy hızmetçilerniñ qonuvı timsaliy bir vaqia oldı, dep ayttı hızmet.
«Bugün, o qonuvnıñ üçünci yıllığında, biz onı çoq daa büyük bir tarihnıñ — mahsus bölükniñ küreşiniñ eñ muim saifelerinden biri olaraq hatırlaymız. 2023 senesi arman ayınıñ 24-nde Qırımdaki qonuv, bu işniñ devamı — ve aynı zamanda onıñ eñ timsaliy anlarından biri oldı. Zmiyinıy adasından Qırım yalısına qadar, mahsus bölük arbiy hızmetçileri, Ukrayina Mudafaa Quvetleriniñ bölüklerinen beraber, adım-adım Ukrayinağa, Rusiyeniñ özünki dep sayğan ve bizge irişilmez yapmağa tırışqan alanını qaytardılar. Arman ayınıñ 24-nde biz Mustaqillikni qayd etemiz, Baş İstihbarat İdaresiniñ arbiy hızmetçileri ise bu bütün senelerde, Ukrayinanıñ — em toprаqta, em de deñizde — mustaqil qalması içün ellerinden kelgenni yapalar», — dep qayd etildi haberde.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
