Arman ayınıñ 22-nde, dört kündir, işğal etilgen Yaltada yanğın devam ete. Bugün işğalciler yanğınnıñ tarqalğanı alan aqqında malümat bermeyler. Sadece Autka rayonında yanğınnı söndürüv işleriniñ devam etkeni aqqında qayd eteler. Keçken kün, olarnıñ malümatına köre, yanğın 50 gektar alanda qayd etilgen edi.
RİA «Qırım Haberler», işğalli Fevqulâde vaziyetler nazirligindeki menbalarğa atıf etip, bu malümat berdi.
«Gece devamında yanğın yerinde topraqqa nezaret yürsetildi (yanğınnıñ yañıdan çıqmasını menlemek içün nevbetçilik). Mütehassıslar vaziyetni toqtadan kontrol eteler, evel ateşten zarar körgen qısımlarnı nezaret eteler ve ortağa çıqqan qorlanmalar ve yanğın ocaqlarına tez cevap bereler», — dep haberde qayd etildi.
Yaltada dağlıq yerde orman yanğını arman ayınıñ 19-ndan sabadan berli devam ete. Başta işğalli qurtarıcılar bildirgen ediler ki, yanğın alanı 3 gektarğa yete, arman ayınıñ 20-nda ise belli oldı ki, yanğın alanı ciddiy şekilde arttı — 10 gektarğa qadar, ve Qırımda yanğınçılarğa yardım etecek göñüllilerni qıdırmağa başladılar. Arman ayınıñ 21-nde, işğalcilerniñ sözlerine köre, küçlü yel sebebinden yanğın 50 gektar alanğa qadar tez şekilde yayıldı. Arman ayınıñ 22-nde işğalciler yanğın alanı aqqında endi malümat bermeyler.
Yanğınnıñ sebepleri aqqında da iç bir şey qayd etilmey. RİA «Qırım Haberler»niñ arman ayınıñ 19-nda haberinde qayd etilgen edi ki, yanğın qıyın irişilebilir bir yerde çıqtı, yanğınçılar dağlıq yerden ayaqnen ketmege mecbur qalalar, tehnikanı yaqlaştırmaq mümkün degil. Arman ayınıñ 20-ndan başlap ise ruslar yanğınnı söndürmek içün aviatsiyanı celp ettiler.
«Qırım yeli» Telegram kanalı bildire ki, bu yanğın, Yaltada arman ayınıñ 19-nda ast stantsiyalarğa yapılğan ücüm vaqtında Rusiye ava mudafaasınıñ çalışması neticesinde çıqtı.
Hatırlatamız ki, arman ayınıñ 23-ne qadar Qırımda fevqulâde yanğın telükesi rejimi devam ete.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
