Arman ayınıñ 18-ne keçer gecesi işğal etilgen Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) ve Qırımnıñ Cenübiy yalısı uçucısız uçaq aletleriniñ ücümlerine oğradı. Qırımtatar Milliy Meclisiniñ Reisi Refat Çubarov bildirdi ki, soñki vaqıtları yarımadağa ücümlerniñ hususiyeti deñişti — esas maqsatlar arasında Rusiye işğalcileriniñ energetik ve logistik astyapı obyektleri bar.
Arman ayınıñ 18-nde Suspilne canlı yayınında o, bu malümatnı tasdıqladı.
Hususan, Ukrayina Mudafaa quvetleri logistika, astyapı obyektlerine ve yarımadada Rusiye arbiy tehnika tamir bazalarına daa ziyade zarar ketirgen edi, dep bildirdi Meclis Reisi.
Bu gece, onıñ malümatına köre, Sevastopolda (Aqyarda) esas sıcaqlıq elektrik stantsiyası zarar kördi, Rusiye AMSAva mudafaası sistemasınıñ işi neticesinde ise, dron işğal etilgen Yaltadaki qurulmağa binağa tüşti.
«Soñki afta, belki de biraz daa çoq, ukrayin quvetleriniñ ücümleriniñ tabiatı deñişti — evelden bu arbiy ava limanları, silâ anbarları, Rusiye Federatsiyası Qara deñiz flotunıñ gemileri olsa, şimdi ise logistika ve energetik astyapı obyektlerine, naqliyat noqtalarına daa çoq diqqat ayırıla. Soñki ücümlerniñ esas maqsadı — Qırımğa elektrik energiyasını çıqarğan ve tarqatqan sıcaqlıq elektrik stantsiyaları, elektrik ast stantsiyalardır. Bu sebepten işğalciler ve Rusiye işğalli ordusı büyük yaqarlıq meselelerine oğraylar, elektrik energiyası qıtlığı ise iqtisadiyatnıñ çeşit saalarına tesir ete. Qırım cenk alanına çevirildi», — dep añlattı Çubarov.
Onıñ qayd etkenine köre, ukrayin arbiy hızmetçileri vatandaş obyektlerine ücüm etmekten saqınalar.
«Bugün saba olğanı kibi bir şey ücüm etilse — Yaltada qurucılıqta olğan çoq qatlı binanıñ üstüne dron tüşti, bu, işğalcilerniñ AMS quvetleri tarafından qullanılğanı sebebinden oldı, ğaliba, radioelektronikağa qarışuv oldı ve Gaspradaki stantsiyağa uçqan dronlardan biri çoq qatlı binanıñ üstüne uruldı. Bunı Qırımdaki insanlar diqqatlı olsunlar, arbiy obyektlerden ve kritik astyapıdan uzaq tursınlar dep aytam», — dedi o.
Çubarovnıñ malümatına köre, şimdi işğalli «fsb hadimleri» ve «uquq qorçalayıcılar»nıñ qoranta azaları yarımadanı terk etmege azırlanalar. Amma diger işğalciler de, toplağan paralarını mülkiyetke yatırğanlar, onıñ içün niyetleri farqlı.
«Olar farqlı yollarnen Qırımğa keldiler, amma er kes yarımdada qanunsız şekilde yaşay. Olar — rusiye işğalcileriniñ vastasız yardımcılarıdır. Kelgenleri kibi bu yerden de çapıp ketecekler. Amma buña (Qırımdaki taşınılmaz mülkke — muar.) para qoyğanlar da bar — aqılsız adamlar Kremlge inandılar ki, Qırım şimdiden Rusiye toprağıdır, para yatırım ettiler, daire ya da ev aldılar ve olarnı tamir ettiler. Şimdi şu insanlar telâşlanalar, çünki bir taraftan olar parasına yazıq olalar, amma başqa taraftan olarnıñ Qırımnı terk etmege mecbur olacaqlarını daa çoq añlaylar. Olar bunı istemez ediler, amma bu olarğa bağlı degildir, bu, Ukrayina Silâlı Quvetlerinden bağlı olacaq», — dep ayttı Çubarov.
O şunı da qoştı ki, Qırımnıñ işğalden azat etilmesini beklegen insanlar yarımadanıñ azat etilmesini beklep yaşaylar ve sabırlı olmağa tevsiye etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
