Ukrayin uquq qorçalayıcıları işğalli Qırım «mahkemecisi»ne cenk cinayeti ve duşmannen işdeşlik yapqanında şübe bildirdiler. Şu cümleden, olarnıñ malümatına köre, 2024 senesi ilk küz ayında o, Ukrayina vatandaşını RF ordusına «çağıruvdan qaçınğanı» içün qanunsız olaraq mahküm etti. Taqipler telükesi sebebinden adam yarımadanı terk etmege mecbur qaldı.
Qırım MC ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeri prokurorlığınıñ saytında bu aqqında haber berildi.
«Qırım MC ve Sevastopol ş. prokurorlığı mahkemege «Simferopol ş. Demiryol rayon mahkemesiniñ reisiniñ muavini»ne dair qabaatlayıcı aktnı yolladı. Onıñ areketleri şahıslar taqımı tarafından yapılğan cenk cinayetleri (Ukrayina CQniñ 28-nci maddesiniñ 1-nci qısmı, 438-nci maddesiniñ 1-nci qısmı) ve duşmannen işdeşlik faaliyeti (Ukrayina CQniñ 111-1-nci maddesiniñ 7-nci qısmı) olaraq belgilendi», — dep haber etti prokurorlıq.
Uquq qorçalayıcı organlardan bir menbası Suspilne Qırımğa anonim şeklinde haber berdi ki, söz Nataliya Kvetkina aqqında yürsetile.
Taqiqatnıñ malümatına köre, 2015 senesi o, sözde «Keriç şeer mahkemesi»nde «mahkemeci» vazifesini aldı. Birazdan o, «Simferopol ş. Demiryol rayon mahkemesiniñ reisiniñ muavini» oldı, 2025 senesi ise bu vazifege yañıdan tayin etildi.
«Qadın em işğal etilgen Qırımda istilâcı devletniñ mahkeme sistemasınıñ çalışmasını temin ete, em de duşmanğa Qırım sakinlerini Rusiye ordusında hızmet etmege mecbur etüv siyasetini yerine ketirmege yardım ete», — dep qayd etti prokurorlıq.
Ukrayin uquq qorçalayıcılarınıñ malümatına köre, 2024 senesi ilk küz ayında o, Ukrayina vatandaşını Rusiye Silâlı quvetlerine «çağıruvdan qaçınğanı» içün qanunsız olaraq mahküm etti. Tekrarlana bilecek taqipler telükesi sebebinden o, işğal etilgen Qırımnı terk etmege mecbur qaldı.
«Böylece «mahkemeci», istilcı devletke vatandaş sakinlerni onıñ silâlı quvetlerinde hızmet etmege mecbur etmege yasaq etken Cenk vaqtında vatandaş ealisini qorçalav aqqında şartnameniñ ve I Qoşma protokolnıñ tapalarını bozdı», — dep hatırlattılar prokurorlar.
2026 senesi ilk yaz ayından qabaatlanğan qadın ukrayin sanktsiyaları altında buluna.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
