Arman ayı 16 gecesi işğal etilgen Qırımda patlavlar eşitildi, Aqyarda (Sevastopolda) ise üç kere aviabastı aqqında haber berildi.
Şeerniñ işğalci «gubernatoru» Mihail Razvojayev bu aqqında haber etti.
Razvojayevniñ aytqanına köre, keçken künde avadan qorçalanuv bölükleri 27 dronnı urıp tüşürdiler. O, em de Aya burnu rayonında 100-den 250 kvadrat metrgece meydanlıqta beş yanğın merkezi aqqında haber etti.
Qırım köpürinde avtomobillerniñ areketi de tıqıldı. Bu aqta yollar boyunca işğal merkezi haber etti, olar köpürge yaqınlaşqan yollardaki vaziyetni qayd ettiler.
«Qırım veter» telegram kanalı vaqianı körgen şaatlarğa esaslanıp, Sovetskiy rayonı üstünde avada patlav olğanını bildirdi. Olarnıñ malümatına köre, patlav Nijniygorsk rayonında da eşitildi. Aqmescit yanındaki Maryino şeerinde de köçme yanğın söndürici gruppalarnıñ işi aqqında haber berildi.
Bunen beraber kanal yarımadadaki mesken yerlerde elektrik energiyası kesilgeni aqqında haberler derc etti. Ayrıca, «Qırım veter» monitoring gruppası sputnik tasvirlerine esaslanıp, Donuzlav gölniñ yanındaki Novoozerne köyündeki arbiy tehnika anbarlarında yanğın olğanı aqqında haber etti. Kanalnıñ malümatına köre, Novoozerne territoriyasında arbiy infrastruktura, şu cümleden gemi ve qayıqlarnıñ bazasınen bağlı anbarlar ve obyektler yerleşken.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
