İşğalciler Qırımdaki Hersones Tavriyasında qanunsız şekilde qazma işleri keçirdiler. Hususan, şeer qurucılığınıñ yañı binaları açıldı.
RİA Qırım Haberler Rusiyege boysunğan Qırım arheologiya institutınıñ müdiri Vadim Mayko bu aqqında bildire.
«Biz Hersonesniñ öz şeer qurucılığınıñ yañı binalarını açıp oldıq ve Hersonesniñ belli hristian abidesi olğan Kruze bazilikasını tedqiq etip oldıq, mında da meraqlı neticeler aldıq ve daa işlenmege kerek olğan şeyler taptıq», — dep Mayko tarif etti.
Hatırlatamız, evel Vadım Mayko Qırımdaki altı qanunsız arheologik ekspeditsiyanıñ işi aqqında haber etken edi.
Çiçek ayınıñ 1-nde Ukrayina Mudafaa nazirliginiñ Baş istihbarat idaresi işğal etilgen Qırımdan qanunsız qazma ve medeniy degerliklerniñ çıqarılmasında iştirak etken Rusiye arheologları ve müessiseleri aqqında yañı malümatnı aydınlattı. Cedvelde — kurgan ve nekropollerden hırsızlanğan artefaktlar, em de ukrain mirasınıñ saipleştirilmesine yardım etken şahıslar bar.
Bİİ malümatına köre, işğal etilgen Ukrayina topraqlarından Rusiye strukturaları eñ azdan 178 medeniy qıymetini alıp ketti. Olarnıñ arasında işğal etilgen yarımadada qazmalarda tapılğan 140-tan ziyade artefakt ve Tavriya Hersonesine ketirilgen 37 eksponat.
Milliy muqavemet merkezinde qayd eteler ki, Aqyarda (Sevastopolda) Hersones Tavriya qoruğını işğalciler qanunsız kâr menbasına çevirdiler. Merkezniñ malümatına köre, Hersones Tavriyasında qanunsız qazma işleri alıp barıla: Rusiye quvetçileri «qara arheologlarğa» tapılğan artefaktlarnı alıp ketmege izin bere. Ödemekni red etkenler cezalana.
Bundan evel Ukrayina Arheologiya institutınıñ baş ilmiy hadimi Evelina Kravçenko «Hersones Tavriyskiy» — büyük bir qabarcılıq leyhası olğanını ayttı.
Aynı vaqıtta Avropa Birligi Şurası Rusiyege qarşı 17-nci sanktsiyalar paketini tasdıqladı. Şu cümleden, Qırımda medeniy mirasnıñ talan etilmesine qarşı sıñırlavlar kirsetti. Cedvelge Aqyarda (Sevastopol) Hersones Tavriyskiy müzey-qoruğınıñ işğalci müdiri Olena Morozova kirdi.
Halqara gumanitar uquq qaidelerine binaen, hususan 1954 senesi qabul etilgen Gaaza konventsiyasına binaen, işğalci devlet işğal etilgen territoriyadaki medeniy qıymetlerni ürmet etmek mecbur, olarnıñ saipleştirüvi, avuştırıluvı ya da statusınıñ deñiştirüvi yasaq etile. Bu qaidelerniñ bozuluvı, şu cümleden degerliklerniñ devlet fonduna integratsiyası, ciddiy bir bozuluv ola ve mesüliyetke çekilmesini közde tuta.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
