İşğalciler insansız gemilerniñ Yaltağa ücüm etkenini bildirdiler. Hususan, katerlerden biri yalığa tüşti.
RİA «Novosti Krım» bunı bildirdi.
«Yalta sakinlerine pencerelerden uzaq turmağa ve balkonlardan çıqmağa tevsiye etildi. Telükesiz yerlerde bulunmaq kerek, dep haber etti şeerniñ Yekâne nevbet-dispetçer hızmeti», — dep qayd etildi beyanatta.
UPD/1 «Qırım yeli» nezaret kanalı, insansız geminiñ ücüminden soñ yanğın çıqqan Hungry Bird qavehanesi/restoranında arbiy hadimlerniñ bulunması mümkün olğanını bildirdi.
«Bugün saba tahminen 11:20-de, restoran ve çoq qatlı evniñ artındaki park yerine altı qara renkli ecnebiy araba keldi. Olardan ekisiniñ arbiy nomeraları bar edi, qalğanlarınıñ nomeraları yoq edi. Maşnalar park yerinde sekiz daqqa turdı, soñra Aluşta tarafına yol aldılar. Yaltağa ücüm etken insansız katerler FPV-dronlarınen donatılğan», — dep qayd etildi haberde.
Qırım yolbaşçısınıñ işğalli mesleatçısı Oleg Krüçkov, katerni minalardan telükesizleştirmege devam etkenlerini bildirdi.
Saat 12:37-de işğalli Qırım FVNFevqulâde vaziyetler nazirligi katerlerniñ ücümi telükesi aqqında haber etti. İnsanlarnı plâjlarnı terk etmege çağırdılar.
«Qırım yeli» nezaret resursı yalıda yanğın aqqında yazdı.
«Qırım yeli»niñ yazğanına köre, Yalta yalısında Hungry Bird qavehanesi yanıp başladı.
Birazdan UMNniñ Bİİ bildirdi ki, o, «işğal etilgen Qırımnıñ cenübiy yalısında Magura arbiy platformalarınıñ timsaliy deñiz paradını keçirdiler».
«2026 senesi arman ayınıñ 7-nde, Rusiye tarafından vaqtınca işğal etilgen Yalta şeeri künü arfesinde, UMNniñ Bİİniñ "Group 13" mahsus bölüginiñ operatorları "Magura" arbiy deñiz platformaları paradını keçirdiler. Böyleliknen Bİİniñ mahsus hızmetçileri serbest Yaltada peyda olğan ve pekitilgen eski bayram ananesini ğayrıdan tiklediler — ukrayin arbiy gemileriniñ şeer yalısı yanında çıqışı. Yaltada "Group-13" ustalarınıñ paradı — Rusiye işğalcilerine Qırımnıñ Ukraina olğanını hatırlatqan daa bir hatırlatma! Yalta aqqında eñ yahşı ukrayin yırınıñ refaqasınen mahsus bayram arfesindeki paradnıñ eksklüziv kadrları — videoda baqıñız», — dep qayd etti istihbarat.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
