Arman ayınıñ 7-ne keçer gecesi Mudafaa quvetleri işğal etilgen Qırımda erte qayd etici RLSnı ve ücüm etici UUAlerini uçuruv yerini urdı.
USQniñ Baş ştabı bu aqqında haber etti.
Bundan da ğayrı, Baş ştab «Geran»/«Gerbera» türlü UUAlerini eki yerastı idare etici yañıdan yayınıcısı zarar körgenini tasdıqladılar — Olenivka (Qırım MC) ve Herson vilâyetiniñ Zaliznıy Port meskün yerinde.
Baş ştabnıñ añlatqanına köre, böyle yañıdan yayınıcılar operatorlar ve ücüm etici dronlar arasında telükesiz bağ ve emirlerniñ berilmesini temin ete, olarnıñ qullanuvınıñ mesafe ve semereligini arttıra.
Bundan ğayrı, Mudafaa quvetleri Rusiye ordusınıñ yaqarlıq-yağ malzemeleri anbarını ve Zaporijjâ vilâyetiniñ Yakımivka civarındaki işğalli ordularnıñ tamir bölügini urdı.
Hatırlatamız ki, Bİİniñ «Group 13» mahsus bölüginiñ askerleri işğal etilgen Qırımda «pantsir-S1» Rusiye ZRTK ve arbiy krannıñ yoq etilmesi aqqında video yayınladı. Ameliyat arman ayınıñ başında oldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
