Oraq ayınıñ 27-nde gece işğal etilgen Qırımda patlavlar oldı, soñra eñ az Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeerlerinde elektrik yoq oldı. Bundan ğayrı, Bağçasaraydaki magistral elektrik ast stantsiyasında ve bu obyektniñ yanında bulunğan Rusiye Qara deñiz flotunıñ 133 maddiy-tehnikiy teminat brigadasınıñ ayrı rayonında yanğın qayd etildi.
Bu gece Sevastopol (Aqyar) «gubernatorı» Mihail Razvojayev ve işğalli Qırım Fevqulâde vaziyetler nazirligi ava telükesini ilân ettiler.
Razvojayevniñ aytqanına köre, Sevastopolda (Aqyarda) Rusiye ava mudafaası sisteması çalıştı ve Balıqlava rayonında üç dronnı urıp tüşürdi.
Bundan da ğayrı, saat 05:26-da Qırım köpründe bir saatten ziyade maşna areketi toqtatıldı.
«Qırım yeli» nezaret Telegram kanalı, kâinat yoldaşından malümatqa esaslanıp, bildirdi ki, yanğın 220 kV «Bağçasaray» ast stantsiyasında ve Rusiye Federatsiyası Qara deñiz flotunıñ 133 maddiy-tehnikiy teminat brigadasınıñ anbarlarında (a/q 73998) qayd etildi.
Şaatlarnıñ kanalğa aytqanlarına köre, saat 02:21-de Simfeoropol (Aqmescit) ve Sevastopol (Aqyar) şeerlerinde elektrik yoq oldı, söndürüvden evel patlavlar olmadı. Saba saat 6-ğa qadar elektrikler yoq edi.
Razvojayevniñ añlatqanına köre, Sevastopolda (Aqyarda) «bütün energetik sistemada qazağa yol bermemek maqsadınen bölgemizden tış elektrik ağlarınıñ aşırı yüklenmesini yoq etmek içün» elektrik energiyası sıñırlandı. Obyektlerde mahsus rejim tayin etildi, içtimaiy obyektler yedek elektrik teminatı shemalarına keçti.
Saat 09:40-ta şeerniñ qullanıcılarınıñ çoqusınıñ elektrik teminatı vaqtınca ğayrıdan tiklendi, dep qayd etti o.
«Amma Qırımnıñ energetik sistemasında küç qıtlığı saqlanıla, çünki şimdilik sıñırlavlarsız areket etmek imkânsızdır», — dep qayd etti «gubernator».
Bundan da ğayrı, Sevastopol (Aqyar) yol-naqliyat astyapısınıñ inkişafı işğalli müdirliginiñ bildirgenine köre, şeerde trolleybuslar muvaqqat çalışmaycaq, 33, 72, 92 nomeralı avtobuslar Balıqlava şosesi ve Nahimov meydanınıñ 5 km arasında 12 nomeralı trolleybuslar yerine, 5, 7, 7A nomeralı trolleybuslar yanında ise büyük sınıflı avtobuslar çalışacaq. Başqa marşrutlarnıñ avtobusları daa büyük aranen qatnay.
Hatırlatamız ki, oraq ayınıñ 26-nda işğal etilgen Yalta alâ daa elektriksiz olıp qala. Tünevin, oraq ayınıñ 25-nde, Aluşta ve qomşu köylerde fevqulâde vaziyet ilân etildi — elektrik 48 saat devamında yoq edi. Anda yaşağan sakinler para tazminatını ala bileler. İşğalciler Yaltada böyle bir rejimni daa kirsetmediler, aksine, telefonlar, elektrik ve fenerler şarj etile bilecek «yardım merkezleri»ni teşkil ettiler. Böyle yerlerde bir sıra sıñırlavlar ve video nezareti bar. Onıñ yerine, generatorlarnıñ bozulmasınıñ sebebi ola bilecek yaqarlıq keyfiyetinden şikâyet etile.
Bundan evel USQniñ Arbiy deñiz quvetleriniñ matbuat kâtibi Dmıtro Pletençuk bildirdi ki, işğal etilgen Qırımda elektrik teminatınen bağlı meseleler ve logistika bozulğan soñ, Rusiye uçaqları deñizlerniñ üzerinde daa az körüne, Rusiye gemileri ise baza noqtalarından çıqmay.
Bundan evel İnsansız sistemalar quvetleriniñ komandanı Robert Brovdi bildirdi ki, işğal etilgen Qırımnıñ azat etilmesi endi keçirile. Onıñ aytqanına köre, esas vazife — yarımadada Rusiye taqımınıñ resurslarnı temin etmek imkânından marum etmektir.
Böyle bir strategiya Qırımnıñ işğalden azat etilmesini ne qadar yaqınlaştıra bilecegi, yarımadanı büyük bir topraq ameliyatı olmadan azat etmek mümkün olğanı ve Rusiye logistika içün müim olğan obyektler qaysı ola bilgeni aqqında — Suspilne Qırım jurnalistleri arbiy mütehassıs Vladıslav Seleznöv ve İvan Stupak ile laf ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
