Qırımnıñ bir qısmı ukrain uçaqlarınıñ ücüminden soñ yarıqsız qaldı. Üç rayonnıñ meskün yerlerinde de suv yoq: Aqmescit, Bağçasaray ve Kefe.
«Qırım Haberler» RİA-nıñ «Qırımenergo» ve «Voda Qırım» işğalci şirketlerine atfı etip bildire.
«Qırımnıñ şimaliy-ğarbi, şarqiy ve cenübiy qısımlarında elektrik energiyasınen bağlı vaziyet qıyın. Elektrik energiyasınıñ sıñırlavı bütün regionda bar», — dep «Qırımenergo» haberinde aytıla.
Feodosiya, Aqmescit, Bağçasaray rayonlarınıñ meskün yerlerinde suv olmaycaq, dep «Voda Qırım» bildire. Suv teminatınıñ bozuluvı ağda bozulğanınen añlatıldı.
İşğal etilgen Qırımda oraq ayınıñ 26-na keçer gecesi patlavlar oldı. Rusiye Mudafaa nazirligi yarımada, diger VİET ve Rusiye regionları üzerinde 133 uçucısız uçaqnıñ tüşürilgeni aqqında bildirdi.
«Qırım veter» nezaret resursı Aqmescit civarındaki Tavriya TES rayonında patlavlar aqqında bildirdi.
Hatırlatamız, oraq ayınıñ 25-nde Aluştada işğalciler fevqulâde vaziyet rejimini ilân ettiler. Böyle bir qarar «Fevqulâde vaziyetniñ ögüni aluv ve yoq etüv ve yanğın telükesizligini temin etüv komissiyası»nıñ toplaşuvında qabul etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
