"Qırım birdemligi" cemaat areketi öz faaliyetini toqtata — ariza

2026 senesi ilk yaz ayınıñ 26-nda Rusiye Adalet nazirligi "Qırım birdemligi" cemaat areketini çetel agentleri cedveline kirsetti. Oraq ayınıñ 21-nde teşkilât faaliyetini toqtatqanını resmen bildirdi.

Teşkilâtnıñ oraq ayınıñ 21-nde Facebookta derc etilgen arizasında aytıla.

"Biz qanunlarnı diqqatnen ögrendik ve cemaat areketimizniñ faaliyetini toqtatmaq qararını aldıq. Bu qararnı qabul etmek bizim içün pek qolay olmadı. On yıl içinde "Qırım birdemligi" tek teşebbüs degil de, qarşılıqlı destek, işanç ve bir-birine qarşı umumiy mesüliyetliknen birleşken insanlarnıñ toplulığı oldı. Amma, şimdiki vaziyette, bu adımnı kerekli dep sayamız. Şu künden başlap saytımız ve içtimaiy ağlardaki saifelerimiz yañartılmaycaq. Cemaat areketiniñ faaliyeti toqtatıldı", — dep qayd etildi arizada.

Arizada qayd etildi ki, bu, işğal etilgen Qırımda soñki on yıl devamında faaliyet köstergen teşkilâtnıñ soñki açıq beyanatı ola.

"Bizler öz aqlarımıznı qorçalamaq ve devlet organlarınıñ qararlarını şikâyet etmek içün qanun tarafından berilgen bütün usullarnı qullanmağa niyetindemiz. "Çetel agenti" statusınıñ berilmesi bizim qıymetlerimiz, printsiplerimiz ve maqsatlarımıznı deñiştirmey, amma şimdiki şaraitte bu faaliyetni evelki formatta devam ettirmek içün imkân körmeymiz", — dep qoştılar cemaat faalcileri.

"Qırım birdemligi" iştirakçileri, olarnı çetel agentleri cedveline kirsetüv siyasiy basqı olğanını qayd eteler.

"Bu qararnı siyasiy basqı olaraq qabul etemiz — faaliyetimizni izolâtsiya etmek ve itibardan tüşürmek, mustaqil cemaat areketine basqı arttırmaq içün qullanılğan bir yarlıqtır. Yıllar devamında o, Qırımdaki insanlarnı qorçalamaq, siyasiy mabüslerniñ qorantalarına qol tutmaq ve yarımadada olğan vaqialarnı aydınlatmaqnen oğraşa edi. Bu yıllar devamında Qırımda taqip etilgen insanlarnıñ ikâyelerini qayd ettik, tutulğan ve apiske alınğanlarnıñ qorantalarına qol tuttıq, uquqiy qorçalavda yardım ettik ve resmiy kün tertibinden tış qalğan malümatnı tarqatıp başladıq. Siyasiy repressiyalarnıñ qurbanlarına yardım etkenlerimizniñ çoqusı özleri defalarca para cezalarına oğradı, memuriy apiske alındı ve cinaiy taqipke oğradı. İşdeşlerimiz ve dostlarımız — uquq qorçalayıcılar, jurnalistler ve göñülliler — alâ daa apis yerlerinde bulunalar", — dep bildirildi arizada.

Читати ще