"Moloçka" operatsiyası neticesinde işğal etilgen Qırımnı Rusiye Federatsiyasınıñ Krasnodar ülkesi ile bağlağan Keriç parom keçiti öz keçitiniñ 75% ğayıp etti. Naqliyat ve yük taşımasını temin etken beş paromdan, flotunıñ tek bir qısmı çalışmağa devam ete.
Robert "Madâr" Brovdi öz Telegram kanalında bu aqqında bildirdi.
Onıñ aytqanına köre, "Kavkaz" limanı ve "Qırım" limanı arasında keçit operatsiyasınıñ başlanuvına qadar "Lavrentiy", "Panagiya", "Yeysk" ve "Mariya" adlı dört parom, em de Keriç limanında yedek olğan SKS-One gemisi temin etilgen edi.
"Madâr" bildirgenine köre, iyülniñ eki aftasında UHH ile işbirlikte İSQ quvetleri bu gemilerge ücüm etti.
Onıñ malümatına köre:
- "Yeysk" paromı oraq ayınıñ 12-nde ve 13-nde yüz bergen ücümlerden soñ Keriçke qaytıp ketirildi, ve onıñ tekrar qullanuvı planlaştırılmay;
- SKS-One gemisi oraq ayınıñ 7, 12 ve 13 künleri bir sıra darbelerden soñ, Brovdiniñ aytqanına köre, yoq etildi ve ğayrıdan tiklenilmey;
- "Mariya" paromı bir qaç kere zarar körgen soñ Keriçke qaytıp ketirilgen edi ve keri qaytmaycaq;
- "Lavrentiy" ve "Panagia" paromları, Madârnıñ aytqanına köre, mustaqil areket etüv qabiliyetini coydılar ve diger gemilerni çekip alğan barjalar kibi qullanılalar.
İSQ komandanı qayd etti ki, cenk areketleri başlağanına qadar dört paromnıñ keçüv quveti 180-250 naqliyat birlemini teşkil ete edi, ve naqliyatnıñ tahminen 80% Rusiye arbiy müessisesiniñ ihtiyaclarını temin ete edi.
Hatırlatamız, oraq ayınıñ 17-nde gece Ukrayina Mudafaa quvetleri Qara ve Azaq deñizlerinde eki tankerni, olardan biri gaz taşıyıcısı, ve çekici gemini, em de "Svetlâk" nezaret gemisini, "TES-Terminal-1" neft terminalını ve işğal etilgen Qırımnıñ Keriç şeerinde yaqıt-mazı malzemeleri anbarını urdılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
