İşğal etilgen Qırımda Rusiye FSBsi, "devlet hainliginde" şübheli sayılğan eki qadınnı yaqalağanını bildirdi. Rusiye mahsus hızmetleriniñ versiyasına köre, biri "Rusiye arbiy hızmetçisiniñ maşnasını 2024 senesi Aqyarda (SevastopoldaRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) patlatqan", digeri ise — "yarımadanıñ arbiy ve energetik obyektleri aqqında malümat toplağan".
Rusiye FSBsi cemaat alâqaları merkezinde bu aqqında haber etildi, dep RİA "Qırım Haberler" yaza.
FSB malümatına köre, yaqalanğanlardan biri — Yalta sakini, Mikolayıv vilâyetiniñ vatandaşı — "Rusiye Federatsiyasınıñ Qara deñiz flotunıñ zabitine qarşı terakt teşkil etüvde" qabaatlana. Rusiye mahsus hızmetiniñ malümatına köre, qadın "öz teşebbüsi ile UHH hadimi ile bağ tuttı". Tahqiqatnıñ versiyasına köre, "kuratornıñ emirinen o, bomba parçalarınen saqlanğan yerni donatıp, onıñ koordinatlarını berdi".
"Soñ UHH, 2024 senesi Aqyarda (Sevastopolda) Rusiye Federatsiyasınıñ Qara deñiz flotunıñ arbiy hızmetçisiniñ maşinasını patlatmaq içün bu yerni qullanğan edi", — dep FSB bildirdi.
İşğal etilgen Qırımnıñ ekinci sakini "Ukrayina mahsus hızmetlerinen işbirligi yapqanı" içün tutuldı.
FSBniñ malümatına köre, o, radio stantsiyaları, urba, silâ ve diger donatmalarnı satın almaq içün Ukrayina banklarından birinde olğan esapından 5 biñ ğrıvnâ USQ faydasına köçürdi.
"Maliye desteginden ğayrı, yaqalanğan kişi, Qırımda yerleşken Rusiye Silâlı quvetleriniñ yanacaq-energetika kompleksiniñ infrastrukturaları, arbiy ava limanı ve diger arbiy obyektleri aqqında malümat topladı", — dep müessisede qayd ettiler.
Qırım Cumhuriyeti ve Aqyar (Sevastopol) boyunca FSB işğalci idaresiniñ malümatına köre, eki qadınğa qarşı Rusiye Ceza kodeksiniñ 275 maddesine istinaden ("Devlet hainligi") cinaiy işler açıldı. Mahkeme olarnı nezaret altında tutmağa qarar berdi.
FSB haber etken soñ, Qırım işğalci memuriyetiniñ yolbaşçısı Sergey Aksönov işğalci müessise hadimlerine yaqalanuv vaqtında yapqan işleri içün teşekkür bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
