Rusiyeniñ Murmansk şeerindeki 17-nci tüzetüv müstemlekesinde tutulğan qırımtatar siyasiy mabüsi Şaban Umerovnıñ yañı sağlıq meseleleri peyda oldı. Onıñ apayı Zarema Umerovanıñ aytqanına köre, aqayınınıñ qol buğumları ağıra, tibbiy teşkerüvler ise onıñ yüksek holesterini bar olğanını köstere.
Siyasiy mabüsniñ apayı Zarema Umerova onıñnen körüşken soñ bu aqqında haber berdi.
Onıñ aytqanına köre, Şaban Umerov yüksek qan basımı, baş ağrısı, yürek ağrısı ve tiş meselelerinden şikâyet ete edi. Onıñ basım ve baş ağrısı içün muntazam sürette ilâc ala. Qadınnıñ aytqanına köre, apiske alınmazdan evel, onı yüregi raatsızlatmay edi.
Endi olğan meselelerge — avuç ve parmaqlarda — qol buğumlarında ağrı qoşuldı. Em de Umerovğa müstemlekede testler yapıldı, olar yüksek holesterin seviyesini kösterdi. Bu sebepten oña ilâc da berildi.
Zarema Umerovanıñ aytqanına köre, siyasiy mabüsniñ bozulğan tişleri alâ daa çıqarılmaq ve tiş protezlerini qoymaq kerek. Onıñ qayd etkenine köre, aqayınıñ yalıñız yuqarı ve aşağı çenesinde bir qaç tişi qaldı, onıñ içün aşnı yahşı aşamaq qıyın.
Haber etilgenine köre, Şaban Umerov müstemleke memuriyetine muracaat etip, tiş protezlerini qoymağa rica etti.
"Olar tiş tehnikcasınıñ kelmesini red etmediler, amma bu meseleni al eteceklerini ayttılar", — dep qoştı Zarema Umerova.
Onıñ aytqanına köre, qırımtatar tikiş işhanesinde çalışmağa devam ete, çünki iş vaqtını tez keçirmege yardım ete. O, apayınen körüşmeden evel bir qaç künge tatil aldı.
Zarema Umerovanıñ aytqanına köre, aqayı apiste tutuv şaraitini tenqit etmey. Onıñ qayd etkenine köre, müstemleke memuriyetinen munasebetleri "normal", aşayt ise keyfiyetlidir.
"O canlı, azimkâr. Er keske selâm aleyküm dey, teşekkür bildire", — dep añlattı siyasiy mabüsniñ apayı.
Şaban Umerov aqqında ne bilemiz
Şaban Umerov 2019 senesi saban ayınıñ 27-nde Qırımda qırımtatarlarnıñ evlerinde keçirilgen tintüvlerden soñ tutuldı. Onıñnen beraber uquq qorçalayıcı organlarınıñ hadimleri daa 20-den çoq qırımtatar cemaat faalcisini tuttılar.
2022 senesi saban ayında Cenübiy bölge arbiy makemesi oña Rusiye Ceza kodeksiniñ 205.5 maddesine binaen 18 yıl apis cezasını berdi. Ükümge binaen, Şabanov beş yıl apishanede, qalğanını ise koloniyada keçirecek edi.
2023 senesi martnıñ 28-nde Apellâtsiya arbiy makemesi Cenübiy bölge arbiy makemesiniñ qararını deñiştirmedi.
Dava malümatına köre, qabaatlanğanlarnıñ elinde silâ, patlayıcı, arbiy yedekler yoq edi, olar terror areketini yapmağa planlaştırmay ediler ve başqalarnı terror areketlerine çağıra ediler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
