Oraq ayınıñ 5-nde gece Ukrayina mudafaa quvetleri işğal etilgen Qırımda "Ğvardiyske" ava limanına ücüm etti. Bu, Qırım yarımadasında Rusiye Federatsiyasınıñ esas arbiy ava limanlarından biridir.
USQ Baş ştabı Facebookta bu aqqında bildirdi.
"O, operativ-taktik ve deñiz aviatsiyasınıñ uçaqları içün, arbiy uçuşlarnıñ teminlevi, logistika ve aviatsiya tehnikasınıñ tehnikiy baqıluvı içün qullanıla", — dep haberde aytıla.
Hatırlatamız, UHH-niñ pilotsız sistemalarınıñ komandanı Robert Brovdi işğal etilgen Qırımda soñki eki künde 10 elektrik santrali bozulğanını bildirdi. Umumen, oraq ayı 1-den 5-ke qadar Ukrayinanıñ vaqtınca işğal etilgen territoriyalarınıñ cenübiy qısmında 37 energetik noqtağa ücüm etildi.
Bundan evel o, işğal etilgen Qırımda oraq ayınıñ 3-nde gece sekiz elektrik stantsiyasınıñ ve gaz kompressor stantsiyasınıñ bozulğanını tasdıqladı.
Aynı zamanda işğal etilgen Qırımda oraq ayınıñ 3-nde elektrik stantsiyalarınıñ bozulması neticesinde yarıqsızlıq oldı. Aynı vaqıtta oraq ayınıñ 5-nde gece bir qaç elektrik stantsiyasında yañı yanğınlar qayd etile. Bundan evel PS "Bağçasaray", "Zimino" ve "Slovânske" darbelerine oğradı, em de Aqyar (SevastopolRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) civarındaki Kaçada ücüm qayd etildi. İşğalciler bir insan elâk olğanını ve eki yaralanğanını bildire.
Bundan da ğayrı, UHH "A" Mahsus Operatsiyalar Merkeziniñ askerleri keçken afta işğal etilgen Qırımda yaqıt ve yağ anbarlarına ve VİET-daki diger arbiy obyektlerge ücüm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
