Ukrayina telükesizlik hızmetiniñ "A" mahsus operatsiyalar merkeziniñ askerleri keçken afta işğal etilgen Qırımda yaqıt ve yağ anbarlarına ve VİET-daki diger arbiy obyektlerge ücüm etti.
UHH Facebookta oraq ayınıñ 5-nde bu aqqında haber etti.
"UHH er kün Rusiye ordusınıñ arbiy imkânlarını qısqarta — tek cebede degil de, arqada da. Bizim diqqatımız vaqtınca işğal etilgen topraqlarğa celp etile, anda duşmanğa cenkleşmege imkân bergen er şeyni yoq etemiz: silâ anbarları, yaqıt, logistika yolları, bağ ve ordu idare etüv infrastrukturaları", — dep Telükesizlik hızmetiniñ yolbaşçısı Yevğeniy Hmara bildirdi.
Yarımadadaki yaqıt-yağ malzemeleriniñ anbarlarından ğayrı, Ğulâypole rayonındaki müim alâqa noqtası ve Mikolayiv vilâyetindeki insansız uçaq komplekslerinden biriniñ idare noqtası zarar kördi.
"Yapılğan darbeler, Rusiye bölükleriniñ ög noqtalarında teminlevini qıyınlaştırdı, logistika ve silâ ve yanacaq teminlevi sistemasınıñ elementlerini bozdı. Bundan da ğayrı, duşman, pilotsız sistemalar bölükleriniñ hadimleri ve arqa teminlevi arasında zarar kördi", — dep haberde aytıla.
Hatırlatamız, oraq ayınıñ 3-nde işğal etilgen Qırımda elektrik stantsiyalarınıñ bozulması neticesinde yarıqsızlıq oldı. Bundan ğayrı, oraq ayınıñ 5-nde gece bir qaç elektrik stantsiyasında yañı yanğınlar qayd etile. Bundan evel "Bağçasaray", "Zimino" ve "Slovânsk" taqımları ücümge oğradı, em de Aqyar (SevastopolRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) civarındaki Kaçada ücüm qayd etildi. İşğalciler bir insan elâk olğanını ve eki yaralanğanını bildire.
İlk yaz ayınıñ 26-nda gece Ukrayina Mudafaa nazirliginiñ Bİİ arbiyleri işğal etilgen Qırımda "Belbek" ava limanında Rusiyeniñ MİĞ-29 qırıcı uçağını yoq ettiler, dep ukrayin istihbaratı oraq ayınıñ 4-nde bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
