İşğal etilgen Qırımda eñ azdan 84 qadın cinaiy davalarda taqip etildi. 2026 senesi oran ayına qadar siyasiy taqipke oğrağan eñ az 59 qırımlı qadın Rusiye Federatsiyasınıñ tahqiqat izolâtorlarında ya da tüzetüv koloniyalarında tutula.
Qırımtatar Resurs Merkeziniñ idarecisi Zarema Bariyeva "Qırım qadınları işğal şaraitinde: repressiyalar ve küreş" matbuat konferentsiyasında işğal etilgen Qırımda qadınlarnıñ taqip etilüvi ile bağlı monitoring neticelerini taqdim etkende bu aqqında bildirdi.
Onıñ aytqanına köre, Rusiye istilâsı başlağan soñ, vaqtınca işğal etilgen yarımadada qadınlarnıñ cinaiy taqip etilüvi bayağı arttı.
"QRM malümatına köre, işğal etilgen Qırımda qadınlarnı apiske alğanlar arasında devlet hainliginen qabaatlaylar. Eñ azından 38 böyle dava qayd ettik, casuslıq — 5 dava, "Hizb ut-Tahrir" işi — 4 dava, Noman Çelebicihan batalyonınıñ işi - 6 dava, em de 7 dava — Yehova Şahitleri davasında", — dep Zarema Bariyeva qayd etti.
Uquq qorçalayıcı qayd etti ki, işğalniñ ilk yıllarında qadınlarğa qarşı cinaiy davalar birer-birer açılğan edi, repressiyalar ise siyasiy mabüslerniñ anaları, apayları ya da qızlarına qarşı memuriy davalarnen sıñırlanğan edi, şimdi ise işğalci akimiyet işğalge qarşı çıqqan ya da Kreml siyasetini tenqit etken qırımlı qadınlarğa qarşı cinaiy davalarnı açtıra.
QRM malümatına köre, 28 qadın tahqiqat izolâtorında tutula, daa 31 — tahqiqat izolâtorında.
Bariyeva işğal etilgen yarımadanıñ tışında qırımlılarnıñ taqip etilüvine diqqat ayırdı. Onıñ aytqanına köre, Rusiye, Türkiye ve Avropa memleketleriniñ ava limanlarında qadınlarnıñ tutulğanını qayd etti.
"Bugün 11 qadın işğalciler tarafından cinaiy davalar sebebinden taqip etile. Çoqusı allarda mahkeme oturışuvları qabaatlanğanlar ve olarnıñ temsilcileri (advokatlar, soy-soplar) iştirak etmegen alda keçirile. Rusiyeniñ apishanelerinde tutulğan siyasiy mabüsler arasında 11 qadın-qız bar. Olarnıñ eñ büyükleri — 71 ve 70 yaşında Galina Dovgopolâ ve Anna Sotsenko. Olar içün çıqarılğan ükümler ayatları içün telükeli ola bile", — dep o qayd etti.
Uquq qorçalayıcı, apiske alınğan siyasiy mabüslerniñ balaları sürgün etilmek ve sığınaqlarğa yollanmaq telükesi altında qalğanı aqqında da bildirdi. Hususan, böyle vaziyetler Natalya Polükh ve Oleg Platonovnıñ ve Esma Nemetullayevanıñ davalarında qayd etildi.
Bariyevanıñ aytqanına köre, Qırımtatar Resurs Merkezi genç qadınlarnıñ, çoq balalı analarnıñ, esli başlı qadınlarnıñ taqip etilüvi, işkence qullanuvı, tam izolâtsiya şaraitlerinde tutulması (inkomunikado) ve işğal etilgen Qırım tışında qırımlı qadınlarnıñ taqip etilüvi aqqında da malümat bere.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
