Ukrayina Yuqarı Şurasınıñ insan aqları vekâletlisi Dmıtro Lubinets, Qırım siyasiy mabüsi Tofik Abdulgaziyevniñ beyne kanseri teşkerilgenine dair türk zenaatdaşına muracaat etti. Rusiye mahkemesi onıñ azat etilmesi boyunca davanı devam ettire. Ombudsmannıñ aytqanına köre, Ukrayina Qırımdan bütün arbiylerni qaytarmaq içün areket ete.
O, QIRIM.Mediağa oraq ayınıñ 1-nde bergen izaatında bu aqqında bildirdi.
Lubinskiyniñ aytqanına köre, o, Türkiye ombudsmeniniñ Abdulgaziyevge nisbeten reaktsiyasını bekley.
O, bütün qırımlı siyasiy mabüslerniñ qaytarıluvı üzerinde çalışqanını da qayd etti. Qırımtatarlarğa nisbeten ayrı-ayrı imayeciler yoq, amma olarnıñ soyadları Ukrayina imayecilerge, hususan Türkiyege bergen umumiy vatandaş reine cedvellerinde bar.
"Bu kategoriya içün muntazam surette işkencege oğratılğanını köstergen adiselerimiz bar. Bazıları Rusiye apishanelerinde tibbiy yardım kösterilmegeni içün elâk oldı", — dep Ukrayina ombudsmanı bildirdi.
Daa evel Prezidentniñ Qırım Muhtar Cumhuriyetindeki Daimiy Temsilcisi Olga Kurışko Qırım platforması ekspert ağınıñ beşinci halqara forumında Ukrayina "er bir qısmı, er bir insanını hatırlay ve kerçekten de bütün devletimiz ve onıñ er bir ayırılmaz qısmı içün adalet oğrunda küreşe", dep bildirdi.
Büyük Britaniya vekâletlisi Charlotte Suren aynı şu tedbirde işğal etilgen Qırımda insan aqları vaziyetini "pek qasevetlendirici" dep adlandırdı, şu cümleden qırımtatarlarnıñ taqip etilüvi, söz ve din serbestliginiñ sıñırlanması, qanunsız tutuvlar ve siyasiy sebeplerden qabaatlavlar.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
