"Artek" lagerinden işğalciler bütün balalarnı alıp ketti

"Artek" bala merkeziniñ işğalci memuriyeti Qırımda yazlıq sağlamlaştıruv kampaniyasını toqtatqan soñ, balalarnıñ çıqışını yekünlegenini bildirdi. Balalarnıñ bir qısmı evlerine, digerleri ise Rusiye Federatsiyasınıñ Krasnodar ülkesindeki lagerlerge yollanıldı.

İlk yaz ayınıñ 27-nde işğal altındaki "Artek" Halqara bala merkeziniñ Telegramında bu aqqında haber etildi.

"Artek" balalarınıñ çıqışı yekünlendi. Qırım Cumhuriyetinde yazlıq sağlamlaştıruv kampaniyasınıñ vaqtınca toqtatıluvı sebebinden balalar evlerine ve Krasnodar ülkesiniñ bala sağlamlaştıruv lagerlerine yollanıldı. Qırım Cumhuriyetinde şimdiki vaqıtta üç şeer civarındaki bala raatlığı ve sağlamlaştıruv teşkilâtında memleketniñ farqlı regionlarından balalar buluna. Olarnıñ çıqışları em ana-babalarınen, em de teşkil etilgen gruppalarnen devam ete. Aqyard (SevastopoldaRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad ) yazlıq raatlanuvnı teşkil etüv ştat rejiminde keçe: bağça ve şeer yanındaki lagerler çalışa", — dep haberde aytıla.

Bundan evel Qırımda "Artek" lageri 1941-1944 seneleri devamında, maliye meseleleri sebebinden 2009 senesi ve 2014 senesi Rusiye tarafından Qırım işğali vaqtında üç kere işini toqtatqan edi.

2026 senesi ilk yaz ayınıñ 22-nde saat 11:00-da işğalciler Qırımda bala lagerleriniñ yerlerini ayırtılmasını toqtattılar. Olarnıñ malümatına köre, sıñırlavlar sentâbrniñ 1-ne qadar devam etecek.

"Turistik ve diger tedbirlerde iştirak etmek içün bala ve bala gruppalarınıñ başqa yerleşüv müessiselerinde yer ayırması, qabul etüvi ve yerleştirüvi toqtatıla", — dep Qırım Cumhuriyeti ükümetiniñ resmiy portalında derc etilgen buyruqta aytıla.

Yerli Telegram kanalları da rezervasyonlarnıñ lâğu etilmesi aqqında haber ete. "Artek" lagerinde ilk yaz ayı 21-de yedinci nevbet başlamaq kerek edi, amma balalarnı qabul etmediler. Rusiye Mudafaa nazirligi, "Artek"niñ balaları evge ketirilecek, dep bildirdi.

Читати ще