"Qırım operativ ştabı" yaqarlıqnı yarımadağa demiryol vastasınen Qırım köpründen ketirmek imkânlarını muzakere ete. Bundan evel ruslar telükesizlik sebebinden bu logistika variantından vazgeçken ediler.
"Ateş" arbiy-partizan areketi, yarımadanıñ işğalli memuriyetlerindeki agentleriniñ ifadelerine esaslanıp, bunı bildirdi.
İşğalciler Ukrayina Mudafaa quvetleriniñ qanunsız keçitke yapqan ücümlerinden soñ, yaqarlıqnı Qırım köpründen keçirmekten vazgeçtiler. 2022, 2023 ve 2025 seneleri köpür zarar kördi, onıñ sebebinden ruslar onıñ çalışmasını sıñırladılar. Bu sebepten, "Ateş"niñ malümatına köre, yaqarlıq tankerleri köpürden keçmey edi.
"İşğalli Qırım akimiyetiniñ operativ ştabı Qırım köpründen demiryol vastasınen yaqarlıq taşımasına izin bermege qarar ala. Sebebi yarımadanıñ neft teminatınen ciddiy meseleleri oldı. Ukrayina Mudafaa quvetleriniñ Keriç ve "Kavkaz" limanındaki parom astyapılarına yapqanı ücüm neticesinde Keriç boğazından yaqarlıq ketirüv imkânları pek sıñırlandı", — dep bildirdi areket.
Agentlerniñ aytqanlarına köre, qıtaiy Ukrayinadan keçken yollar içün vaziyet daa yahşı olmay.
"Rusiye arbiy hızmetçileri, esas teminat marşrutları ukrayin dronlarınıñ devamlı ateş nezareti altında olğanını, bu ise yaqarlıq ve yağ malzemeleriniñ taşınmasını qıyın, yavaş ve telükeli yapqanını añlaylar", — dep qoştı "Ateş".
Hatırlatamız ki, ilk yaz ayınıñ 23-nden başlap işğalciler şahsiy maşinalarda 200 litrlik yaqarlıq taşımağa izin bereler. Daa evel bir naqliyat vastasında Qırımğa 100 litr şingenlik alıp ketmek mümkün edi.
Bu arada Rusiye akimiyeti, ukrayin dronları Rusiye neft zavodları ve bazalarına ücüm etkeni içün yüz bergen buhran sebebinden benzin ve dizel yaqarlığınıñ satılmasını sıñırlamağa devam ete. Rusiye kütleviy haber vastalarınıñ malümatına köre, vaqtınca sıñırlavlar eñ az 53 vilâyette kirsetildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
