Bazarertesi künü, ilk yaz ayınıñ 22-de işğal etilgen Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ yalısında 20 zelzele qayd etildi.
"Novosti Krıma" agentligi, V. İ. Vernadskıy adına Qırım federal universitetiniñ Seysmologiya ve geodinamika institutınıñ işğalşi müdiriniñ muavini Marına Bondarğa atfı etip, bunı bildirdi.
"Soñki kere qayd etilgen Qara deñiz zelzelesi Sevastopol rayonında gece saat 22:21-de oldı. O, 1,7 magnitudalı, küçsüz edi ve ilk yaz ayınıñ 22-nde 20-nci oldı. Şimdilik yañı bir yer teprenüvi qayd etilmedi", — dep qayd etti Bondar.
Hatırlatamız ki, ilk yaz ayınıñ 22-nde gece maalinde zelzeleler başlandı.
Avropa-Aq deñiz seysmologiya merkeziniñ malümatına köre, ilk yaz ayınıñ 22-nde mütehassıslar saat 5:09, 7:11 ve 08:48-de 3,6 magnitudalı eñ az üç zelzele qayd ettiler. Saat 09:22-de daa bir 4,4 magnitudalı yer teprenüvi aqqında haber etildi.
Milliy seysmik közetüv sistemasınıñ mahsus nezaret merkeziniñ malümatına köre, ilk yaz ayınıñ 22-nde işğal etilgen Qırımnıñ yalısında eñ az altı zelzele oldı.
Hatırlatamız ki, Suspilne Qırım muarririyeti evel Qara deñiz bölgesinde yañı küçlü zelzele telükesi ne qadar ciddiy olğanını ve yarımada içün ne aqibetleri ola bilecegini ögrendi.
Ukrayina Arbiy-deñiz quvetleriniñ yedeginiñ 1-inci derece kapitanı Andriy Rıjyenko qayd etti ki, küçlü zelzeleniñ ortası deñizde olsa, Qırım köprü de telüke altında qala bilir.
"Qırım köprü qurulğanda, ve tarih bayağı uzun edi, bu esnasnı toqtatqan esas faktor — yer teprenüvi ihtimali edi. Ve, misal içün, almanlar Ekinci Cian cenki vaqtında temeli qoyulğanda, olar tam bu sebepten vazgeçtiler", — dep qayd etti o.
Qırımdan ğayrı, Karpatlar Ukrayinanıñ seysmik faal bölgesi olaraq qala. Geofizik İnstitutı qayd ete ki, mevcut doquz seysmologik stantsiyağa Mıkolayiv ve Odesa vilâyetlerinde yañı stantsiyalarnı qoşmağa planlaştırıla. Bu, Qırım yarımadasına tesir ete bilecek yerastı sarsıntılarını daa doğru taqip etmege imkân berecek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
