Ukrayina, Avropa Birligi, Büyük Britaniya, Kanada ve İsviçre sanktsiyaları altında bulunğan IRTYSH gemisi ilk yaz ayında işğal etilgen Sevastopolnıñ (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adnıñ) "Avlita" ububat terminalında tahminen 32-35 biñ tonna boğday yükledi.
"Barıştırıcı" Merkeziniñ SeaKrime leyhasınıñ jurnalisti Katerına Yaresko, 2026 senesi ilk yaz ayınıñ 11-16 künleri arasında terminal yalısında turğan gemini qayd etken uydu resimlerine esaslap, bunı bildirdi.
Yükniñ ihracatçısı olaraq "Tritikum grupp" Rusiye şirketi qayd etildi. Gemi Cibuti limanı olaraq qayd etilgen edi, lâkin bu liman, belli olğan malümatqa köre, marşrutnıñ keçüv noqtası ola bilir. Anda yükni teşkergen soñ, ububat Yemenniñ husitler tarafından kontrol etilgen Salif limanına ketirile bilir.
Yareskonıñ malümatına köre, böyle bir shema işğal etilgen topraqlardan çıqarılğan ukrayin ububatınıñ taşıması içün endi bir qaç kere qullanıldı.
Ukrayina Mudafaa nazirliginiñ Bİİniñ portalınıñ War&Sanctions malümatına köre, 2025 senesi mayıs ayında Avropa Birligi IRTYSH gemisine qarşı telükeli gemicilik ameliyatları qullanılğan Rusiye neftini taşığanı içün sanktsiyalarnı kirsetti. Bundan soñ gemi İsviçre, Büyük Britaniya, Kanada ve Ukrayina tarafından sanktsiyalarğa oğradı.
Bundan ğayrı, 2026 senesi kiçik ayda Ukrayina geminiñ kapitanına qarşı sanktsiyalar kirsetti. 2025 senesi mayıs ayından başlap IRTYSH Rusiye ve İran arasında Hazar deñizi üzerinden seferler yapqanı da belli.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
