İlk yaz ayınıñ 16-nda ve ilk yaz ayınıñ 17-ne keçer gecesi Ukrayina Mudafaa quvetleriniñ bölükleri Rusiye ordusınıñ bir qaç arbiy ve logistik obyektine ücüm etti. Zarar körgen obyektler arasında Qara deñizdeki Rusiye Federatsiyasınıñ kölge flotunıñ tankerleri ve işğalcilerniñ arbiy logistikasını temin etmek içün qullanılğan eki avtomobil köprü bar.
USQniñ Baş ştabı bu aqqında haber etti.
Ukrayina Mudafaa quvetleriniñ bölükleri Qara deñizde bulunğan Rusiye Federatsiyasınıñ kölge flotunıñ FINA A (IMO 9283306) tankerini urdı.
Ukrayina arbiy hızmetçileriniñ bildirgenlerine köre, maqsat muvafaqiyetnen zararlandı, lâkin geminiñ zararlanğan derecesi şimdilik belgilene.
Gemi Avropa Birligi, İsviçre, Büyük Britaniya, Kanada ve Ukrayina tarafından sanktsiyalarğa oğratıldı. Mudafaa quvetleriniñ malümatına köre, gemi halqara sanktsiyalar ve sıñırlavlardan qaçınıp, Rusiye menfaatları içün neft ve neft mahsulatlarını taşımaq içün qullanılğan edi. Tankerniñ uzunlığı 244,6 metr, umumiy tonnalığı ise — 62 002 birlik.
Bundan da ğayrı, ukrayin arbiy hızmetçileri Rusiye ordusı tarafından Ukrayina cenübiniñ vaqtınca işğal etilgen topraqları arasında arbiy adamlarnı, tehnikanı ve logistika teminatı içün qullanılğan obyektlerge ücüm etti.
Hususan, Şimaliy-Qırım kanalı boyunca Stavkı mesken yeri ve Herson vilâyetindeki Voyinka köyü yanındaki avtomobil köprü zarar kördi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
