İşğal etilgen Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ Rusiye tarafından "Yehova şaatları" davası çerçivesinde mahküm etilgen sakini Yevhen Jukov Yaroslavl vilâyetiniñ müstemlekesinde apis cezasını çekip azat etildi.
Ukrayina prezidentiniñ Qırım Muhtar Cumhuriyetindeki temsilciligi bunı bildirdi.
"Azatlıq er vaqıt yanımda edi", — dep Yaroslavl vilâyetindeki müstemlekeden azat etilgen soñ Jukov ayttı.
"Aşırıcılıq" davasınıñ daa eki mabüsi, Volodımır Maladıka ve Volodımır Sakada, alâ daa apiste bulunalar.
Hatırlatamız ki, Yevhen Jukov, Volodımır Maladıka ve Volodımır Sakada 2020 senesi işğalli quvetçiler tarafından tutuldı. Olar, Rusiyede yasaq etilgen "Yehova şaatları" diniy teşkilâtına ait olğanları içün "aşırıcı teşkilât"nıñ faaliyetini teşkil etkenlerinde qabaatlandı.
Qabaatlavnıñ esası, gizli FSB agentleri tarafından qayd etilgen dört ibadetniñ videoları oldı. Mahkeme oturışında FSB hadimi qabaatlanğanlarnıñ areketlerinde aşırıcılıq ya da diniy duşmanlıq alâmetleri olmağanını tanıdı. Amma 2022 senesi orta küz ayında işğalli mahkeme üç kişini de umumiy rejimli müstemlekede altı yılğa üküm etti.
2023 senesi orta küz ayında qanunsız "Sevastopol şeer mahkemesi" imayeciniñ istinaf şikâyetini red etip, ükümni deñiştirmedi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
