Birleşken Milletler Teşkilâtınıñ deñiz uquqı şartnamesine köre qurulğan Arbitraj mahkemesi Qara deñiz, Azaq deñizi ve Keriç boğazında yalı devletiniñ aqlarınıñ bozulğanı sebebinden Ukrayinağa qarşı Rusiye davasında qarar aldı.
Ukrayina Tış işler nazirligi bunı bildirdi.
Dava 2016 senesi Ukrayina tarafından, Rusiye Qırım işğal etken soñ yapqanları sebebinden başlatılğan edi. O, Qara ve Azaq deñizlerinde ve Keriç boğazında BMTnıñ deñiz uquqı şartnamesiniñ bozuluvı aqqında tüşüne edi.
Arbitraj mahkemesi, Rusiye Keriç köprü, suvastı energetik kabelleri ve gaz borusı qurucılığı vaqtında Şartnameniñ bir sıra maddesini bozğanını belgiledi. Hususan, Rusiye bu leyhalarnıñ etkisi aqqında kerekli qıymet kesip, mütenasip maruzalarnı derc etmedi ve deñiz müitiniñ qoruvı saasında kerekli işbirlikni temin etmedi.
Bundna ğayrı, mahkeme Rusiyeniñ Azaq deñizi ve Keriç boğazı "tarihiy suvlar" ya da kerçekten de Rusiye nezareti altında olğanları aqqında iddialarını da red etti.
"Soñki qararında Arbitraj mahkemesi Azaq deñizi ve Keriç boğazı — "Rusiye gölü" olğanını tasdıqlamadı, aksine, olarnıñ statusını eki devlet — Ukrayina ve Rusiye Federatsiyasınıñ içki suvları olaraq tasdıqladı. Ukrayina Qara deñiz, Azaq deñizi ve Keriç boğazında yalı devleti olıp qala ve halqara uquq tarafından berilgen bütün suveren aqlarını saqlap qala. 2022 senesinden soñ Rusiyeniñ iç bir qanunsız bir taraflı areketleri buña tesir etmedi", — dep Ukrayina Tış işler nazirligi qayd etti.
Tış işler nazirligi şunı da qayd etti ki, mahkemeniñ qararı halqara uquq tarafından Rusiyeniñ işğal etilgen Qırım ve onıñ yanındaki deñiz akvatoriyalarınıñ statusını deñiştirmek ıntıluvlarınıñ tanılmamasınıñ daa bir tasdıqıdır.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
