İşğal etilgen Qırımda aşayt qıtlığı qayd etile. Yerli sakinler tükân raflarından şeker, kürpe, un, tuz ve makaron mahsulatları ğayıp olğanını haber eteler. Bazı aşayt tükânlarında endi bir elge aşayt mahsularınıñ satıluvına sıñırlavlar kirsettiler.
Ukrayina Silâlı Quvetleriniñ Mahsus operatsiyalar quvetleriniñ Komandanlığı yanındaki bölük olğan Milliy muqavemet merkezi (MMM) ayrıca bunı qayd etti.
"Vaziyetniñ sebebi tek Rusiye tarafından ketirilgen migrantlarnıñ ve askerlerniñ emiyetli sayısı sebebinden talapnıñ artması degil de, logistika boyunca ciddiy meselelerdir. Qırım ep ziyade ayrıca anklavğa çevirile. Qırım köprü esas naqliyat yolu rölüni oynayamaz, deñiz yolları daimiy telüke astında ola, işğal etilgen topraqlardan yollar ise ukrayin dronlarınıñ ücümi astında ola'', — dep MMM añlattı.
İşğal etilgen Sevastopolda bir elge aşayt mahsulatınıñ satıluvını sıñırladılar. TikTok/Павло Тимошенко
İşğalciler er angi halq ögünde añlatmalarından qaçınalar, Qırım sakinleri ise boş raflar, aşayt mahsulatını almaqta sıñırlavlar ve zarur mahsulatlarnıñ fiyatı yükselmesinen ziyade rastkelişeler, dep merkez bildirdi.
"Aslında, Rusiye işğal etilgen yarımadanı adetteki kölemlerde temin etmek imkânını yavaş-yavaş coyıp tura. Qırım yaqarlıq, aşayt ve resurslar yetkizmek ağırlaşqan adağa beñzey. İşğalli memuriyet mesele miqyasını gizley, yarımada sakinleri logistika izolâtsiyasınıñ öz tükânlarındaki aqibetlerini is etmege başlaylar'', — dep MMM bildirdi.
Bundan evel Qırımtatar Milliy Meclisiniñ reisi Refat Çubarov da işğal etilgen Qırımda aşayt mahsulatı qıtlığı meselesini ayrıca ayrıca qayd etti.
''Qırımnıñ çeşit köşelerinden haberler kele: işğal etilgen Qırımdaki yaqarlıq başqa saalarda da muvazenesizlikniñ sebep ola — eñ populâr mahsulatlar, şu cümleden şeker, kürpe, yağ, un ve konservalar tükân raflarından ve toptan satuv bazalarından ğayıp ola'', — dep Facebook Çubarov yazdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
