"Qırım diversantları" ilk davalarından birinde iştirak etken Dmıtro Ştıblikovnıñ sağlıq vaziyeti fenalaştı.
"Qırım uquq qorçalayıcı gruppası", siyasiy mabüsniñ qızı Tetâna Ştıblikovağa esaslanıp, bunı bildirdi.
Onıñ sözlerine köre, siyasiy mabüs Omsk vilâyetindeki 6-nci müstemlekede 7 yıl devamında bulunğan kameradan avuştırıldı.
"Evel er eki afta babamdan mektüp kele edi, şimdi 1,5 aylıq susqunlıq, ve tek yaqında mektüp keldi. Tibbiy yardım ve sağlıq vaziyeti aqqında aytsaq: oña bergen ilâclarımıznı saqlaylar ve babama bermeyler. Er vaqıt yañı qaideler uyduralar. Altı ayğa bir posılka izin berile. Hronik hastalıqları kerginleşe. Tam teşkerüv yapılmasa, bu daa ciddiy bir şeyge çevirile bilir", — dep qızı tarif etti.
Hatırlatamız ki, 2016 senesi boş aynıñ 9-nda Rusiye FSBniñ hadimleri Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad da) Dmıtro Ştıblikovnı yaqaladılar. Onıñnen beraber apayı Olena da tutuldı, onı da Rusiye quvetçileri sorğuğa çektiler. Bir qaç kün devamında Ştıblikovnıñ bulunğan yeri belli degil edi. Boş aynıñ 10-nda FSB, o, "Ukrayina Mudafaa nazirliginiñ Baş istihbarat idaresiniñ diversiya-terroristik gruppası"na kirgenini bildirdi.
Dmıtro Ştıblikovnıñ birinci ükmüni işğalli "Sevastopol şeer mahkemesi" 2017 senesi boş aynıñ 16-nda ilân etti. O, sert rejimli müstemlekede 5 yılğa ve 200 biñ rublelik para cezasına mahküm etildi.
2022 senesi çiçek ayınıñ 27-nde Cenübiy bölge arbiy mahkemesiniñ mahekemcisi Kirill Krivtsov Dmıtro Ştıblikovnı 19 yıl ve 6 ayğa apiske aldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
