İşğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad da) benzin satıluvı sıñırlandı, çünki yaqarlıq teminatı meseleleri bar. Yaqarlıq stantsiyalarında bir araba ya da konteyner içün 20 litrden ziyade benzin berilmez.
RİA "Novosti Krıma", Rusiye kontrolindeki Sevastopol (Aqyar) gubernatorınıñ muavini Pavel İyenoğa atfı etip, bunı bildirdi.
İşğalli akimiyetniñ qayd etkenine köre, "logistik qıyınlıqlar" sebebinden şeerde benzin teminatı meselesi olıp çıqtı. İyenonıñ aytqanına köre, "Atan" benzin stantsiyaları ağında şimdilik AI-92, AI-95 ve dizel yaqarlıqları bar, amma er bir stantsiyalarda degil. "TES" benzin stantsiyasında yalıñız Aİ-92 benzin bar, Aİ-95 ve dizel yaqarlığı ise aqşamğa qadar beklenile. Şimdilik benzin stantsiyalarınıñ bir qısmında yaqarlıqnı tek kuponlar vastasınen satalar.
"Bugün isbatlanğan bir sıñırlav kirsetile. Suniy aqibetlerniñ ögüni almaq içün, benzin stantsiyalarında 20 litrden ziyade benzin kanistrağa ya da maşnağa satılmaz. Añlayışlı olmağa rica eteler, biz bütün kerekli tedbirlerni köremiz", — dep İyeno qayd etti.
Aynı zamanda "Qırım yeli" Telegram kanalı Sevastopoldaki (Aqyardaki) benzin stantsiyalarında kergin vaziyet aqqında bildire. Olarnıñ malümatına köre, şimdi "TES" ağında yalıñız AI-92 markası benzin bar, "Atan" benzin stantsiyalarında ise — AI-95 "Premium", AI-92 ve "Premium" dizel yaqarlığı bar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
