İşğal etilgen Qırımda mayıs 9-na arbiy parad ve diger kütleviy tedbirlerniñ keçirilmesi telükesizlik sebebinden lâğu etildi.
Mayısnıñ 5-nde Telegramda Qırım "başı" Sergey Aksönov bunı bildirdi.
Onıñ aytqanına köre, "Ölümsiz polk" yürüşi de lâğu etildi.
"Aynı vaqıtta, sevgili veteranlarımızğa ürmet köstermek, elâk olğanlarnıñ hatırasını añmaq, bayram tedbirlerini çeşit şekilde keçirmek içün kerekli ve mümkün olğan er şeyni yapacaqmız", — dep Aksönov qoştı.
Daa evel "Ateş" arbiy-partizan areketi bildirdi ki, mayısnıñ 9-na parad arfesinde Rusiye komandanlığı, Moskvadaki tedbirlerniñ repetitsiyası ve azırlanuvında iştirak etmek içün cebeden azır arbiy hızmetçilerni çıqara.
Mayısnıñ 4-nde Ukrayina prezidenti Volodımır Zelenskıy bildirdi ki, Rusiye mayısnıñ 9-nda Moskvada keçirilecek paradda ukrayin dronlarınıñ peyda olmasından qorqa. O şunı da qayd etti ki, bu yılki tedbir çoqtan berli ilk sefer arbiy tehnika olmadan keçirilecek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
