İşğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) 23 yaşındaki yerli sakin tutuldı ve oña qarşı "aşırıcılıq faaliyetinen oğraşmaq içün cemaat çağıruvları" sebebinden cinaiy dava açıldı, o 5 yılğa mahkeme etile bilir.
Şeerniñ işğalli polisi mayısnıñ 5-nci künü Telegramda bu aqqında haber etti.
"İnternet meydanını közetüv vaqtında Rusiye İçki işler nazirliginiñ Sevastopol şeerindeki aşırıcılıqqa qarşı küreş merkeziniñ hadimleri cemaat çatlarından birinde rus halqını aqaretlegen ve memleketimizniñ ealisini yoq etmege çağıruvlarnen tefsirlerni taptılar", — dep haberde qayd etildi.
"Polis"niñ malümatına köre, 23 yaşındaki kollec studenti messencerlerden birindeki "vatandaşlarına qarşı zorbalıq areketlerine çağırğan" yazmalar astında tefsirlerni yerleştirdi.
İşğalli müessise qoştı ki, kiçik ayda bu adam endi "Rusiye Federatsiyasınıñ Silâlı Quvetlerini itibardan tüşürgeni içün" memuriy ceza — 50 biñ rublelik (15 biñ ğrıvnâlıq) para cezasını alğan edi.
Bundan evel "Tribunal. Qırım epizodı" teşebbüsiniñ uquq qorçalayıcıları Qırımdaki havfsızlıq küçleriniñ ukrayin tarafdarı nazar noqtası içün halqnı taqip etmege yanaşuvlarınıñ deñişmesine diqqat çektiler. Olarnıñ malümatlarına köre, 2025 seneniñ yazından başlap, işğal etilgen yarımadada "aşırıcılıq" ve "terrorizm teşviqatı" boyunca uydurılğan cinaiy davalarnıñ sayısı arttı. Olardan birisi 2026 senesi çiçek ayınıñ başında belli oldı. Söz, Ğlib Malkov aqqında yürsetile.
Hatırlatmaq kerek ki, 2026 senesi birinci kvartalında Qırımtatar resurs merkezi eñ az 17 tutuv, 6 tintüv, 57 apis aluv, 17 sorğu, adaletli mahkeme aqqınıñ bozulmasına dair 68 dava ve sağlıq aqqınıñ bozulmasına dair 23 dava qayd etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
