İşğal etilgen Aqyarda (SevastopoldaRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad ) rusiyeliler Balaklav rayonında "Laspi" qoruqını qurıp başladılar. Bugün deñiz kenarında ve yalı boyu qurucılar ağaçtan yapılar qurıp, ağaçlar arasında inşaatlarnı qurmaqtalar.
Qoruq yerinde tabiatqa zarar ketirilgeni aqqında ForPost Sevastopol medyası yaza.
İşğalci neşirniñ bildirgenine köre, "Alnika" şirketi daa evel "Delfin" plâjına yaqın bir yerde kira evlerini qurğan edi. Şimdi mında "Laspi körfezi" sıñır şirketine ait olğan vesiqalarğa köre, aşhane içün qurucılıq kenişletile. Bu şirket, bir qaç kere Qara deñizge aqıntı tökülmesi ile qabaatlanğan "Hayaller körfezi" musafirhanesi ile bağlıdır. Maqaleniñ müellifleri şunı da qayd eteler ki, "Laspi körfezi" daa bir skandalnen bağlı — şahıs ve uquqiy şahıslar ögündeki borclar sebebinden onıñ mülkiyetini "mahkeme" tevqif etti.
"Bu qurucılıq "Laspi Qayaları"nıñ tabiatına zarar ketirmez, ve onıñ üzerinde faal bir insan yükü nasıl kösterilecegini belli olacaq, belki de, nevbetteki teşkerüvden soñ. Mesele şunda ki, ne içün qıymetli topraqnıñ bir qısmında, tabiatqa nisbeten lâqaytlıq köstergenini defalarca körgen insanlar biznes yapa?", — dep haberde aytıla.
Bundan evel RİA "Novosti Qırım" Vernadskiy adına Qırım federal universitetiniñ dotsenti Sergiy Kiselovnıñ malümatına esaslanıp, qaviy qurucılıq Qırım manzarasınıñ unikalligini yoq ete bile, dep yazdı.
"Qırımda tabiat müiti pek qıymetli, oña böyle cinaiy munasebet kösterilmey. Menimce, Qırımda tabiat ve medeniy landşaftnıñ saqlanuvı aqqında qanun ve qurucılar içün yekâne mimarcılıq siyaseti aqqında qanun olmalı", — Kiselov dedi.
Bundan da ğayrı, bir qaç kün evelsi Rusiye akimiyeti "Hersones Tavriyasınıñ Qadimiy şeeri ve Çembalo ve Kalamit qalaları" medeniy miras obyektiniñ yanında eki otelniñ qurulmasına razılıq berdi. 16-18 metr mesafesinde Balaklava medeniy qatı XIX asırnıñ soñunda — XX asırnıñ başında tapıldı.
Hatırlatamız, Suspilne Qırım muarririyeti öz menbalarından 2043 senesine qadar "Qırımnıñ qurucılıq planı"ndan harita aldı.
İşğalcilerniñ, hususan, qoruq zonalarda qurmağa planlaştırğanları aqqında "Rusiye Qırımnıñ qoruq zonalarını qurmağa planlaştıra: işğalci elit villanı, musafirhaneni, demiryol ve Disneylendni qurmağa niyetlene".
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
