Rivne şeerinde sabıq Qırım uquq qorçalayıcısını devlet hainligi ve duşmannen işbirlik içün 15 yılğa mahküm ettiler. Yarımada işğal etilmeden evel o, Krasnoperekopsk şeerinde tahqiqatçı olıp çalıştı. Tahqiqatnıñ malümatına köre, soñra ruslarnen işbirlik yapmağa razı oldı ve işğalli uquq qorçalayıcı organlarında karyera qurdı. Şimdi o, Herson vilâyetiniñ işğal etilgen toprağında İçki işler nazirliginiñ işğalli bölüklerinden birisini idare ete.
Rivne vilâyetiniñ Rivne vilâyet prokurorlığı Facebookta bunı bildirdi.
"Yarımada işğal etilgen soñ Ukrayina İçki işler nazirliginiñ Krasnoperekopsk İçki işler nazirliginiñ sabıq taqiqatçısı (şimdiki Yañı Qapu şeeri) işğalcilerinen işbirlik tutmağa başladı. Rivne vilâyet prokurorlığınıñ prokurorları mahsus mahkeme esnasında uquq qorçalayıcı devlet hainligi ve duşmannen işdeşlikte qabaatlı olğanını isbatladılar. Rivne şeer mahkemesiniñ ükmünwn o, 15 yılğa azatlıqtan marum etilip, uquq qorçalayıcı organlarında, devlet akimiyeti ve yerli idare organlarında, em de 10 yıl devamında cemaat hızmetlerini yapqan organlarda vazifelerini eda etmek aqqından marum etildi ve mal-mülki müsadere etildi", — dep haberde qayd etildi.
Açıq menbalardan belli olğanı kibi, söz Anatoliy Muravlöv aqqında kete.
Tahqiqatnıñ malümatına köre, o, 2016 senesi Yañı Qapuda "Rusiye polisiniñ belediye-ara bölügi"niñ idarecisi vazifesini aldı. Soñra ise Ermeni Bazarındaki bölükniñ yolbaşçısı oldı.
2023 senesi işğalciler onı işğal "Rusiye İçki işler nazirliginiñ Herson naqliyat bölügi"niñ yolbaşçısı olaraq tayin ettiler. Bu vazifeni o bugünge qadar eda ete.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
