Çiçek ayınıñ 22-ne qadar işğal etilgen Qırımda 1729 Rusiye ordusınıñ itibarını tüşürüv davası qayd etildi. Qararlarnıñ 53%-inde (851) qadınlar aqqında söz yürsetile.
Ukrayina prezidentiniñ Qırımdaki temsilciligi bunı bildirdi.
"2026 senesi vaqtınca işğal etilgen Qırımda Rusiye Federatsiyasınıñ silâlı quvetleriniñ itibarını tüşürüv aqqında Rusiye Federatsiyası Ceza qanunnamesiniñ 20.3.3. maddesine binaen 1729 dava qayd etildi. 1607 davasında para cezası berildi ya da dava başqa maddelerge istinaden mahkemege qoşuldı. Sekiz davanıñ baqılması devam ete. Qararlarnıñ 53%-i (851) qadınlarğa qarşı, 47% (753) ise erkeklerge qarşı çıqarıldı", — dep haberde aytıla.
Hatırlatamız ki, Qırım işğal etilgen topraqlarda ve Rusiyede Rusiye ordusınıñ itibarını tüşürüv memuriy davalarınıñ sayısına köre birinci yerde qala. Yılnıñ başından berli bu madde boyunca 58 dava açıldı.
Bunı Suspilne Qırımnıñ tefsirinde prezidentniñ Qırımdaki daimiy temsilcisiniñ muavini Denıs Çıstikov bildirdi. Hatırlatamız ki, evel temsilcilik yarımadada 1715 "Rusiye ordusını itibardan tüşürgüv" davası qayd etilgenini bildirgen edi, 53%-i — qadınlarğa qarşı.
"Şahsiyetlerge kelgende, 53%-i — memuriy mesüliyetke qadınlarnı celp etüv. İşğal başlağan 2022 senesine baqqanda, şimdi qadınlar faal iştirak etkenini köstere, olar da çette turmayıp, aqlarını qorçalay ve vaqtınca işğal etilgen Qırım toprağınıñ aitligini qayd eteler. 58 yañı davağa esaslanıp, bir buçuq yıl evelsi başlanğan bir tendentsiya devam etkenini qayd etmek kerek: olardan çoqusı Ermeni Bazar mahkemelerinde baqıla", — dep Denıs Çıstikov tarif etti.
Bu davalarda eñ çoq qarar Ermeni mahkemesi qabul ete, dep Çıstikov ayta. Bu, Herson vilâyetinen eki keçiş noqtasına eñ yaqın olğan şeerdir, anda Qırımğa ketken ve qaytqanlarnı baqalar.
Denıs Çıstikovnıñ aytqanına köre, temsilcilik davalarnıñ sayısına dair malümatnı taqip ete, mahkeme qararlarını nezaret ete.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
