İşğalli Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) akimiyeti çiçek ayınıñ 27-nde saat 19:35-te ava telükesini ilân etti. Soñra Omega ve Hersones burnu civarında deñiz üstünde patlavlar aqqında haber keldi.
İşğalli "gubernator" Razvojayev Telegramda bu aqqında yazdı.
"Sevastopolda (Aqyarda — terciman) arbiy hızmetçiler USQniñ ücümini toqtatalar, AMS ve mobil ateş gruppaları çalışa. İlk malümatlarğa köre, Hersones, Omega ve Şimaliy taraf rayonlarında 11 UUA tüşürildi. Lübımivka rayonında REB vastasınen UUA toqtav yeri yanında yolğa tüşürildi, kimse yaralanmadı. Sofiya Perovska soqağı rayonında UUAleriniñ parçaları yolğa tüşti. İlk malümatqa köre, şeerde iç bir vatandaş obyekti zarar körmedi", — dep Razvojayev yazdı.
O şunı da bildirdi ki, çiçek ayınıñ 26-nda kütleviy ücümden soñ işğal etilgen Sevastopolda (Aqyarda) 156 mesken ev, 98 maşina ve Büllür Burundaki "Qaharman şeeri" sovet obeliski zarar kördi. İşğalli akimiyet 4 zarar körgenini ve vatandaş astyapısınıñ bozulğanını bildirdi, amma arbiy obyektlerniñ zarar körgenini bildirmedi.
Hatırlatamız ki, UHH bildirdi ki, çiçek ayınıñ 26-nda gece Rusiye Federatsiyasınıñ Qara deñiz flotunıñ Sevastopoldaki (Aqyardki) arbiy-deñiz bazasında ve Qırımda "Belbek" arbiy ava limanında bir sıra müim arbiy maqsatlarğa zarar ketirildi. Hususan, Rusiye Arbiy deñiz flotunıñ "Yamal" büyük desant gemisi, Rusiye Arbiy deñiz flotunıñ "Filçenkov" büyük desant gemisi ve "İvan Hurs" keşif gemisi zarar kördi. Em de RF "Lukomka" arbiy taqımınıñ oquv merkezi, avağa qarşı mudafaa quvetleriniñ radiotehnik istihbarat ştabı, MR-10M1 "Miss-M1" radiolokatsiya stantsiyası, "Belbek" ava limanındaki Mig-31 uçağı ve bu ava limanınıñ tehnikiy-işletüv qısmı.
Çiçek ayınıñ 26-nda saba işğalli Sevastopol (Aqyar) "gubernatorı" Mihail Razvojayev şeerde "eñ büyük ücümlerden biri" ve 71 dronnıñ yoq etilmesi aqqında ilân etti. Gece üç kere ava telükesi ilân etilgen edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
