Ukrayinanıñ vaqtınca işğal etilgen topraqlarında, şu cümleden Qırımda, "Sarı şerit" cemaat areketiniñ faalleri ukrayinlerni Pasha bayramınen hayırladı ve azat etilüvini beklegenlerini hatırlattı.
Çiçek ayınıñ 12-nde Telegram kanalında bu aqqında bildirdiler.
"Ne de olsa — insanlar dua ete, sepetlerni bayram ete ve Ukrayinanıñ qaytmasını bekley. Çünki Pasha, sınavlardan soñ yañıdan doğuvnıñ kelmesi kerekligini hatırlata. Ve er yañı saba bizni ğalebege yaqınlaştıra", — dep faaller qayd ettiler.
Yerli sakinler, VİETda Ukrayina devlet renklerinde ve vatanperver dekoratsiyasınen paska ve pısankalarnı fotoğa çıqardılar.
"Aqmescit (Simferopol) ukrayinlerni Pasha ile hayırlay!", "Ukrayina! Hoş kelgen Pasha! Seveyik, bekleymiz", — dep işğal etilgen şeerlerniñ faalleri yazalar.
Çiçek ayı 12-de prezident Volodımır Zelenskıy ve birinci hanım Olena Zelenska ukrayinlerni Pasha bayramı ile hayırladılar. Mında olar Ukrayinağa 1500 künden berli devam etken cenkte dayanmağa yardım etken iman ve birlikniñ küçüni qayd ettiler.
Zelenskıy dey ki, Pasha ukrayinlerniñ qoranta, ananeler ve bir-birine qol tutuvdan tapqan ışıq ve ümütniñ timsali ola. Sınavlarğa baqmadan, halq öz kimligini saqlay ve barışıq kelecegi içün küreşe. Prezident kelecek Pasha bütün Ukrayina içün ilk barışıq bayramı olmasını istedi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
