Aqyarnıñ (Sevastopolnıñ) işğalci gubernatorı Mihail Razvzayev çiçek ayınıñ 5-nde saba şeer civarında deñiz üzerinde beş maqsatnıñ urulğanını bildirdi.
O, Telegramda bu aqqında yazdı.
"Aqyarda (Sevastopolda) AMS ve Rusiye Qara deñiz flotunıñ küçleri UHQ ücümini toqtatmaqta. Şimal tarafı ve Fiolent rayonı civarında deñiz üstünde 5 ava nişanı uruldı. Aqyar (Sevastopol) qurtaruv hızmetiniñ malümatına köre, şeerde iç bir vatandaş obyekti zarar körmedi", — dep haberde aytıla.
Çiçek ayınıñ 5-nde saba ve kündüz Qırımda yüz bergen patlavlar aqqında "Qırım veter" Telegram-kanalı da haber etti.
12:34-te kanal abunecileri Fiolent burnu rayonında patlav aqqında bildirdiler.
Bundan ğayrı, "Qırım veter" yazğanına köre, saat 12:04 Bağçasaray rayonınıñ Pişşane köyünde ateş açılğanı eşitildi.
Aqmescitte (Simferopolde) de uçaq köründi. Hatırlatamız, Aqyarda (Sevastopolda) telüke saat 11:15 ilân etilgen edi.
Hatırlatamız, işğalciler çiçek ayınıñ 5-ne keçer gecesi Rusiye regionları ve işğal altındaki Qırım üzerinde 87 uçucısız uçaqnıñ tüşürilüvi aqqında bildirdi. Rusiye Mudafaa nazirliginiñ malümatına esaslanıp, RİA "Novosti Qırım" bu aqqında yaza. Yarımada üzerinde qaç uçaqnı yoq etkenleri belli degil.
"Qırım veter" gazetası Aqyar (Sevastopol) ve Perekopsk rayonındaki patlavlar aqqında yazdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
