Simferopolda (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad te) işğalciler bir teşviqat leyhasını açtılar — "Rusiye — menim tarihım" "tarihiy" multimedia parkı. Anda yarımada "tek Rusiye tarihı"nıñ bir qısmı olğanı degil ve Qırımnıñ "er vaqıt Rusiye" olğanı aqqında tarif etile.
Sahte malümatqa qarşılıq merkezi bunı bildirdi.
"Bu paalı ve büyük bir leyha — interaktiv sergiler, raqamiy tehnologiyalar ve Rusiye monarhlarınıñ eykelleri. Bu yerlerge balalar ve gençler merkeziyleştirilgen şekilde celp etilip, ideologik işleme aletlerine çevirile. Park Vladimir Putinniñ emrinen quruldı ve vaqtınca işğal etilgen topraqlarda Kremlniñ Rusiye kimligini tiklev strategiyasınıñ bir parçasıdır. O, yarımadanıñ keçmişini "yekâne Rusiye tarihı"nıñ bir qısmı olaraq köstere ve Kremlniñ yarımada işğaliniñ sebebi olğan "er vaqıt Rusiye" Qırımı aqqında ikâyesini ilerilete", — dep haberde qayd etildi.
SMQM qayd etti ki, parknıñ qurucılığı işğal etilgen Qırımda astyapı ve içtimaiy saalarnıñ maliye etilmemesi sebebinden yapıldı.
"Teşviqiy leyhalar içün resurslar er vaqıt bar. Bu, Kremlniñ prioritetlerini köstere: Moskvada adamlarnıñ yaşayış seviyesine emiyet bermeyler, olarnıñ sadıqlığını ise teşviqatnen qazanmağa isteyler", — dep SMQM yazdı.
Hatırlatamız ki, işğalciler Qırımdaki "Yañı Hersones" kompleksini teşviqat maqsadınen qullanalar. Çeçek ayında anda diger işğal etilgen topraqlardan, hususan Herson ve Zaporijjâ vilâyetlerinden balalar içün ekskursiyalar planlaştırıla. RİA "Novosti Krım"nıñ bildirgenine köre, tahminen biñ bala qabul etilecek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
