Qırım Gauleyteri Aksönov işğal etilgen yarımadada Rusiye ordusına askerlikke aluv boyunca gençlernen işniñ quvetleştirilüvi aqqında bildirdi. Bunen beraber, Ukrayina istihbaratınıñ malümatına köre, Rusiyede aliy tasil sisteması deñişe — oquv fiyatı köterile, bücet yerleri qısqartıla, keçüv balı köterile. Bunıñ yerine Rusiye akimiyeti abituriyentlerge ve studentlerge, oquvnıñ tolusınen ödemesi ya da bedava şekilge keçüvi içün Mudafaa nazirliginen añlaşmalarnı imzalamağa teklif ete.
İşğal etilgen yarımadanıñ gençleri arasında Rusiye ordusında hızmet etüvnen bağlı teşviqatnıñ quvetleştirilüvi aqqında "Qırım yolbaşçısı" Sergey Aksönov 2026 senesi saban ayınıñ 30-nda "vatandaşlarnı arbiy hızmetke azırlav, orduğa çağıruvnıñ teşkil etilmesi ve keçirilmesi içün merkeziy yarış komissiyasınıñ" toplaşuvında bildirdi.
"Bizim umumiy vazifemiz — gençlerniñ arbiy hızmetke azırlanuvınıñ semereliligini arttırmaqtır. Qırımda tasil programmalarını azırlamaq, yañı şekillerni ve usullarnı kirsetmek içün optimal çezüvlerni qıdırmağa azırlar. Yaş nesilge şahsiy nümüne ve cemiyette böyle bir müit kerek ki, er kes öz rolüniñ emiyetli olğanını ve Rusiyege kerçekten kerek olğanını añlasın", — dep Aksönov bildirdi.
Ukrayina Tış istihbarat hızmetiniñ malümatına köre, Rusiye ordusında gençlerniñ, hususan studentlerniñ sayısını arttırmağa planlaştıra. Kelecek oquv yılından itibaren Rusiyede aliy oquv yurtlarında bücet yerleriniñ sayısı qısqartılacaq, añlaşma boyunca oquv fiyatı köterilecek ve keçüv balı köterilecek.
"Rusiye, ealiniñ çoqusı içün aliy tasilniñ irişimini arbiy hızmetnen bağlı olğan sistema şekillendirüvini tamamladı. Kelecek oquv yılından itibaren bücet yerleri qısqartılacaq, kontratlı oquv fiyatları ise bayağı artacaq. Moskvanıñ yetekçi universitetleri bakalavrnıñ fiyatını ilân etti: ayrı saalar içün 4 million ruble (tahminen 2 million ğrıvnâ — muar.) — Rusiye paytahtınıñ civarında bir odalı daire fiyatı kibi. Bölgeler da artta qalmaylar: Novosibirsk universitetinde populâr yönelişler boyunca bakalavr 1 million rublege (≈500 biñ grivnağa) yete", — dep haberde qayd etildi.
Ukrayina istihbaratı mütehassıslarınıñ malümatına köre, Rusiye qorantalarınıñ çoqusı bu qadar parağa irişip olamay. Bu sebepten Rusiye akimiyeti gençlerge arbiy añlaşmalar imzalamağa teklif ete.
"Buña paralel olaraq, 2026/2027 oquv yılına kirmek içün eñ az bal sıñırı köterildi, mart ayından başlap ise fizika, müendislik ve IT-hususiyetleriniñ çoqusı içün mecburiy ders oldı. Mütehassıslarnıñ esaplarına köre, tek bu imtianğa acele azırlıq içün eñ az 500 biñ ruble (tahminen 250 biñ ğrıvnâ — muar.) masraf etilecek. Onıñ mantığı pek sade: oquş içün para yoq — oquvnı ödegen Mudafaa nazirliginen añlaşma bar. Muqaveler, universitetke yekâne bilet ola", — dep UTİH añlattı.
Hatırlatamız ki, 2022 senesi Rusiyeni Bologna tasil sistemasından çıqarıp, Rusiye aliy oquv yurtlarınıñ diplomları Avropada tanılmaycaq.
"Student "vatan"ğa bağlıdır ve tek içki qaidelerge boysunmağa mecbur. İstedadlı askerlerniñ azlığı sebebinden ordu studentlerni faal sürette celp ete. Bu sene memlekette gençlerniñ mecburiy ya da qısmen mecburiy arbiy hızmetke celp etilüvi ile bağlı bir sıra skandal yüz berdi. Minosvitniñ "tasil keyfiyetini arttırmaq" lafları kerçekten de kelişmey. İslâatlar ilimge doğrultılmay — kelecek kiriş kampaniyasını Mudafaa nazirligi içün bedava rekrutler bazasına çevireler", — dep Ukrayina istihbaratı qayd etti.
Hatırlatamız ki, çeçek ayınıñ 1-den Rusiye komandanlığı, al-azırda vaqtınca işğal etilgen Qırımda ve Ukrayinanıñ vaqtınca işğal etilgen diger topraqlarında bulunğan bütün askerlerni cebede zarar körgen bölüklerni toldurmaq içün cenk areketlerine celp etmege planlaştıra. Bu malümatnı Suspilne Qırımğa Ukrayina Cenübiy mudafaa quvetleriniñ nutuqçısı Vladıslav Voloşın da tasdıqladı. Onıñ aytqanına köre, Rusiye Baş ştabınıñ mütenasip emirleri Ukrayinanıñ er bir VİE toprağına ait.
"Bu tek Qırımdan degil, Ukrayinanıñ vaqtınca işğal etilgen diger topraqlarından da kele. Bu Donetsk, Luğansk, Herson, Zaporijjâ. Demek ki, bütün askerlikke kütleviy çağırılğan cenk tecribesine saip olmalı. Rusiye arbiy areketlerniñ tecribesini Ukrayinada ala", — dep Voloşın añlattı.
Bundan da ğayrı, Cenübiy mudafaa quvetleriniñ nutuqçısı bildirdi ki, işğalli Rusiye Federatsiyasınıñ 810-ncı brigadasını divizionğa qadar arttırmağa ve batalyonlarnı polklarğa qadar kenişletmege istey, böyleliknen bu taqım daa büyük ola ve daa büyük vazifelerni eda etmek içün celp etile bile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
