İşğal altındaki Qırımda soñki afta içinde üç üküm çıqarıldı — "nazizmni reabilitatsiya etüv", "inanğanlarnıñ duyğularını aqaretlev" ve "devlet hainligi" içün. Daa eki yerli sakinni "Ukrayina mahsus hızmetlerine malümat bergenleri" ve içtimaiy ağlarda "terrorizmni aqlağan" tefsirleri içün mahkeme etecekler.
Suspilne Qırım muarririyeti saban ayı 23-29 künleri işğalciler tarafından yarımada sakinleriniñ taqip etilüvini derc ete.
İşğal etilgen Qırımda "Ukrayina mahsus hızmetlerine malümat bergen" adamnı mahkeme etecekler
Rusiye tahqiqatınıñ versiyasına köre, 48 yaşında olğan adam "içtimaiy ağlarda Ukrayina Telükesizlik hızmetiniñ vekili ile subetleşe edi" ve "Rusiye arbiy obyektleriniñ yerleşüvi aqqında malümat toplamaq vazifesini aldı".
"Adam silâ, tehnika ve mudafaa inşaatlarınıñ yerleştirilüvi aqqında malümat topladı. Foto ve videonı Kıyivniñ mütehassıslarına yolladı", — dep prokuratura haberinde aytıla.
Rusiye uquq qoruyıcılarınıñ bildirgenine köre, 2024 senesi devamında adam "arbiy uçaq ve naqliyatnıñ foto ve videolarını çıqarıp, bu malümatnı yollağan edi".
İşğal etilgen Alupka sakini içtimaiy ağlarda yazğanları içün 7 yılğa üküm etile bile
İşğal etilgen Qırımda Alupka sakinini tuttılar, Rusiye quvetçileri onı Telegram mesajlaşuvında yazğanları içün "terrorizmni aqlağanında" qabaatlay. Onı yedi yılğa qadar azatlıqtan marum qaldıra bileler.
Rusiye uquq qoruyıcılarınıñ malümatına köre, tutulğan kişi — 1971 senesi doğma aqay. Onı, Rusiye tilşınaslıq ekspertizasınıñ neticelerine köre, "terrorizmni aqlağanını köstergen" tefsirlerniñ derc etilmesi ile qabaatlaylar.
FSBde, aqay "öz şahsiy saifesinden mektüplerni messencerlerden birinde qaldırdı", dep bildirdiler. Bu sebepten oña qarşı Rusiye Federatsiyasınıñ Ceza kodeksiniñ 205.2 maddesine istinaden cinaiy dava açıldı.
Qırım sakini “natsizmni reabilitatsiya etkeni” ve “inanğanlarnıñ duyğularını aqaretlegeni içün” 5,5 yılğa mahküm etildi
İşğal etilgen Qırımda Feodosiya (Kefe) rayonındaki Partızanı köyüniñ 30 yaşındaki sakini «natsizmni reabilitatsiya etkeni” ve “serbestlik ve aqsızlıq aqqını bozğanı» içün 100 biñ ruble (30 biñ ğrn) cerimenen 5,5 yılğa umumiy rejimli ceza müstemlekede mahküm etildi.
Oña 3 yıl devamında saytlarnı idare etmek de yasaq etildi.
İşğalli teşkerüvge köre, 2022 senesi çeçek ayında bu adam içtimaiy ağda «Ğalebe künü bayramınıñ timsallerini mashara etecek» resimni derc etti.
Bundan da ğayrı, 2023 senesi ilk küz ayında o, diniy neşirniñ tübünde tefsirler qaldırdı, işğalciler bunı rus halqınıñ ananelerine ve tarihiy hatırasına aqaret olaraq añlaylar.
İşğal etilgen Qırımda "Ukrayinağa malümat bergeni" içün adam 16 yılğa üküm etildi
Rusiye kontrolindeki "Qırım Yuqarı mahkemesi" Canköy rayonınıñ sakinini "devlet hainligi" davasında 16 yılğa mahküm etti. Adamnı Ukrayina mahsus hızmetlerine malümat bergeninde qabaatladılar.
Rusiye tahqiqatınıñ versiyasına köre, adam "Ukrayina havfsızlıq hızmetiniñ temsilcisinen içtimaiy ağlardan biri vastasınen bağ tuta edi ve arbiy tehnika ve mudafaa inşaatlarınıñ yerleştirilüvi aqqında malümat toplamaq vazifesini aldı.
Rusiye mahkemesi "Hizb ut-Tahrir davası"nıñ altıncı Bağçasaray gruppasınıñ mabüslerini oraq ayına qadar apiske qaldırdı
Rusiye Federatsiyası Cenübiy bölgeniñ arbiy mahkemesi "Hizb ut-Tahrir davasın"nıñ altıncı Bağçasaray gruppasınıñ mabüslerine tevqif tedbirini uzattı. Dört qırımtatar 2026 senesi oraq ayınıñ 7-ne qadar apiste qalacaq.
Onıñ aytqanına köre, imayeci tarafnıñ delillerine baqmadan, mahkeme prokurornıñ Memet Lümanov, Rustem Osmanov, Mustafa Abduramanov ve Aziz Azizovnı apiste tutuv müddetini uzatmaq muracaatını qanaatlendirdi.
Mahkeme oturışında advokat davanıñ taraflı olğanını bildirdi.
"Bizler bu dava bütünley qabaatlı olğanını ayttıq. Müvekkilim Aziz Azizov tahqiqat izolâtorında qabaatını tanımağanı içün buluna, prokuror aytqan sebeplerden degil", — dep Kurbedinov tarif etti.
Qırımda qadın "Ukrayinağa malümat bergeni" içün 18 yılğa üküm etildi
İşğal etilgen Qırımda qadın "rus arbiy tehnikası aqqında malümatnı ukrayin tarafına bergeni"nde qabaatlanıp, "devlet hainligi" davasında 18 yılğa mahküm etildi.
Rusiye tahqiqatınıñ versiyasına köre, Moskva vilâyetiniñ sakini "Rusiyeniñ Ukrayinağa tolu miqyaslı istilâsına qarşı çıqtı ve 2024 senesi kiçik ayda Qırım toprağında RF Silâlı quvetleriniñ zırhlı tehnikanıñ turğan yerini fotoresimler ve videoğa çekti".
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
