Vaqtınca işğal etilgen Qırım mekteplerinde ecnebiy til dersleriniñ sayısını qısqartalar, aynı zamanda talebelerni RF ordusı içün gizletici ağlarnı örmege çağıralar.
"Poçuti" cemaat teşkilâtı, yerli sakinlerniñ aytqanlarına esaslanıp, bunı bildirdi.
Teşkilâtnıñ malümatına köre, yarımada sakinlerinden biri, adı bildirilmemek şartınen, ayttı ki, ilk küz ayından başlap Qırım mektep talebelerine aftada bir kere ingliz tili dersleri berilecek.
Onıñ aytqanına köre, qırımtatar tili mecburiy programmadan çıqarılıp, fakultativ şekline keçirildi, bu ise oquğan talebelerniñ sayısınıñ eksilmesine ketire.
"Müdirimiz, bu tilge ihtiyacımız yoq, dep ayta. Qırımtatar tili olarda aman-aman yoq. Olar bunı fakultativ olaraq yaptılar — ister ket, ister ketme. Ve, elbette, çoq bala bunı istemey. Olar deyler ki, tükânğa barsam, daa yahşı olur", — dep qadın bildirdi.
O şunı da ayttı ki, bir çoq mektep balalarnı, bazıda teneffüs vaqtında ya da daa yahşı baa içün, Rusiye arbiy hızmetçileriniñ ihtiyacları içün gizletici ağlarnı örmege mecbur eteler.
"Soy-sopım 9 sınıfnı bitirgende onıñ ağzaviy imtianları olacaq edi. O maña: "Oca, ağ örmege istegenlerge avtomatik olaraq "üç" qoymaq mümkün olğanını ayttı", — dep yarımada sakini bildirildi.
Teşkilâtnıñ qayd etkenine köre, böyle ameliyatlar işğal etilgen yarımadada tasilniñ daa da askeriyleştirilüvini ve balalarğa olğan mefküreviy tesirniñ artqanını köstere bile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
