Sabıq siyasiy mabüs Volodımır Baluh, onı Kıyivniñ Şevçenko rayonı topraq askerlikke aluv ve içtimaiy destek merkezinde urğanlarını bildirdi. Paytahttaki Merkeziy eyyeti ücüm etkenini red ete, vesiqalarnı teşkergenini ve Baluhnı AEEe yollağanını ayta.
Müessise Facebookta bu aqqında haber etti.
"Tahqiqat-operativ gruppası tibbiy müessisege muracaat etip, bütün vaziyetni ögrenmek ve arizanı qabul etmek içün yollanıldı. Vaqia uquq ceetinden nasıl tanılğanı meselesi çezilmekte", — dep müessise qayd ete.
Volodımır Baluh, Suspilne Qırımğa tefsirinde, köküs ve omuzlarında yaralar bar olğanını tarif etti. Onıñ aytqanına köre, onı tünevin, Roman Çervinskıynıñ mahkemesinden soñ, TAA ve İDMe ketirdiler.
"Çervinskıy davasınıñ prokurorı meni qabaatlap, men onı qabaatlap, Peçersk rayon bölüginde izaat bermege davet etti. Men keldim, izaat berdim, soñra çıqışta, eki metr uzaqlıqta, bir bilyeçik bar edi — meni içine tıqıp, qıdırılğanımnı aytıp, TAA ve İDMe alıp kettiler. Er kes arbiy urbasında edi, amma kimse soyadını aytmadı, kimse vesiqalarını köstermedi", — dep o ayttı.
Baluhnıñ aytqanına köre, uquq qorçalayıcılar ondan şaatlıq aldılar.
Kıyiv Topraq askerlikke aluv ve içtimaiy destek merkezi Volodımır Baluhnıñ Şevçenko rayon bölügine ketirilgenini tasdıqladı. Yaralanğanını red ete.
"Onıñ esirlikte bulunğanını, unvan ya da mukâfat berilmegenini, azatlıqtan marum etüv aqqı olmağanını, askerlikke alınmağanını ve askerlikke çağırılğanını qayd eteler. Vatandaşnı ATEarbiy-tibbiy eyyeti keçişi içün yolladılar. Askerlik esnası tarafından ATE keçüv ve malümatnı tüzetüv yardımı yoq edi, bu ise onıñ TAA ve İDMde bulunma vaqtını uzattı. Daa soñra onıñ arbiy-tibbiy eyyetinden keçüvi toqtatıldı. Vatandaş TAA ve İDMde bulunğan vaqıt arbiy hızmetçiler tarafından oña qarşı iç bir qanunsız areketler yapılmadı, fizikiy küç ya da sıñırlav vastaları qullanılmadı", — dep haberde qayd etildi.
Bundan da ğayrı, TAA bildirgeni kibi, diger cedvellerden alınğan şahsiy malümatnı yañartqanda, Volodımır Baluhnıñ 2 gruppa saqatlığı bar olğanı aqqında malümat peyda oldı.
"Amma belli olmağan bir sebeplerden, o, qanunğa köre saqatlıqnameni resmiyleştirmedi", — dep müessise añlattı.
Hatırlatamız ki, Volodımır Baluhnıñ urulması aqqında Ukrayina halq mebusı Volodımır Aryev bildirdi.
Bilgenlerimiz
- Baluhnıñ taqip etilüvi 2014 senesi Qırım işğalinden soñ başlandı. O, Serebrânka köyündeki evinde Ukrayina bayrağını astı. Bir qaç kere çıqarıldı, amma adam onı kene asıp qoya edi.
- 2017 senesi arman ayında Baluhnı 3,5 yılğa qadar apis cezasına mahküm ettiler, onı "arbiy yedeklerni saqlağanında" qabaatladılar. 2017 senesi orta küzniñ başında "mahkeme" ükümni lâğu etip, davanı yañıdan baqmağa avale etti. 2018 senesi qara qış ayında Baluhnı mustemlekede 3 yıl 7 ayğa ve 10 biñ ruble para cezasına mahküm ettiler.
- 2019 senesi ilk küzniñ 7-nde deñiştirüv çerçivesinde Ukrayinağa 35 insan qayttı, olarnıñ arasında 24 esir deñizci ve siyasiy mabüsler Sentsov, Kolçenko, Baluh, Suşçenko, Karpük, Klıh, Ğrıb, Yevhen ve Artur Panovlar, Bekirov ve Sızonovıç.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
