İşğal etilgen Aluştada Rusiye memurları yalı kenarında beyaz qamereniñ rekonstruktsiyasını ilân ettiler. Faqat saban ayınıñ 19-nda onıñ bütünley yıqılğanı belli oldı.
Rusiye "Krım 24" telekanalı Aluştadaki yalı kenarındaki qamereniñ yıqılğanı aqqında yazdı.
İşğalli "Aluşta memuriyetiniñ yolbaşçısı" Galina Ogneva Rusiye jurnalistlerine aytqanı kibi, sutunlarnıñ "vaziyeti yaramay" olğanı içün yıqıldı.
"Ogneva, eski sutunlarnıñ kritik vaziyeti sebebinden yıqılğanı kerek olğanını qayd etti. Berilgen vesiqalarğa köre, yañı sutunlar özgün ölçüsi, tüsü ve malzemesinen aynı olacaq. Bundan ğayrı, qamere yapısınıñ temel elementleri ve örtüniñ bütünley ğayrıdan tiklenüvi planlaştırıla. Aluşta memuriyetiniñ yolbaşçısı ettirilgen qasevet içün afu soradı ve iş aqqında eki afta evelsi haber etkenini hatırlattı", — dep haberde qayd etildi.
İşğalciler, beyaz qamereniñ sözde "rekonstruktsiyası"na 9,8 million ruble (tahminen 5 million ğrıvnâ — muar.) ayırmağa planlaştıra ediler.
Aluştadaki qamereniñ sutunlarınıñ yıqılmasınen video "Qırım yeli" Telegram kanalında derc etildi.
Bugün Aluştadaki yalı kenarı böyle körüne.
Aluştadaki qamere (beyaz qamere olaraq belli) — Aluşta şeeriniñ esas mimariy abidelerinden biri ve "zeyaret kartı"dır. O, 1950 seneleri Ekinci Cian cenkinden soñ kurortnıñ ğayrıdan tiklenüviniñ timsali olaraq qurulğan edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
