Ukrayina mudafaa quvetleri saban ayınıñ 15-nde işğal etilgen Qırımda Lübknehtivka rayonında "Düşman" ve "Parol" radiolokatsiya stantsiyalarına ve Dalnıy civarında S-400 "Triumf" zenit raketa kompleksiniñ başlanğıç qurulışına ücüm etti.
USQ Baş ştabında bu aqqında haber etildi.
"Saban ayınıñ 15-ne keçer gecesi Rusiye istilâcısınıñ ava mudafaasınıñ imkânlarını eksiltmek maqsadınen Ukrayina Mudafaa quvetleriniñ bölükleri vaqtınca işğal etilgen Qırımnıñ Lübknehtivka rayonında 59N6-E "Duşman" ve 73E6 "Parol" radiolokatsiya stantsiyalarına ücüm etti", — dep haberde aytıla.
O, saban ayınıñ 10-nda Qırımda Primorskiy civarındaki "Valday" radar kompleksine zarar ketirildi, dep añlattı.
Saban ayınıñ 15-nde gece işğal etilgen Qırımda patlavlar oldı ve Rusiye ava mudafaası çalıştı. Şaatlarnıñ aytqanına köre, Aqmescit (Simferopol) rayonındaki Tavriya elektrik stantsiyası, Aqyarnıñ (Sevastopolnıñ) Fiolent burnu rayonında patlavlar oldı, Ay-Petri dağında ise radar stantsiyaları yandı.
Ukrayina mudafaa quvetleri soñki vaqıtları vaqtınca işğal etilgen Qırımda Rusiye arbiy obyektlerine ücümlerini quvetleştirdi. İşğalcilerniñ telükesizlik sistemaları, radar stantsiyaları, uçaqları ve diger tehnikası zarar kördi.
"Evel bu tek-tek noqta darbeleri edi, bizler quvandıq, şimdi olar kerçekten de sistematik oldılar ve bizler üç qat ziyade quvandıq. Çünki bizim komandanlığımız, insansız uçaqlarnı işğal etilgen topraqlarda maqsatlarğa ücüm etüv esnasını konveyerge qoydı, yani, bir kün de olsa, maqsatlarğa ücüm etilmey", — dep Suspilne Qırım UHH sabıq hadimi, arbiy ekspert İvan Stupak tarif etti.
Onıñ aytqanına köre, ukrayin arbiyleri ne qadar çoq çeşit ve paalı obyektlerge ücüm etse, Rusiyeniñ öz qabiliyetini ğayrıdan tiklemesi o qadar qıyın olur. Stupak qayd etti ki, böyle darbelerniñ doğrulığı ukrain istihbaratınıñ semereli çalışqanını ve yarımadada malümat menbalarınıñ bulunğanını köstere.
Hatırlatamız, mahsus operatsiyalar quvetleriniñ "Deep-strike" bölükleri Rusiyeniñ Keriç boğazınıñ tarafında Çuşka şeerindeki "Kavkaz" Rusiye limanına ücüm etti. Onı rusiyeliler işğal etilgen Qırım ile alâqalar içün qullana. O, cenk çatışuv sızığından aman-aman 300 km uzaqlıqta buluna.
Saban ayınıñ 14-ne keçer gecesi Ukrayina Silâlı quvetleri ordusı vaqtınca işğal etilgen Qırımda Rusiye ordusınıñ arbiy obyektlerine ücüm etti. Zarar körgen obyektler arasında — "İskander" raketa kompleksleriniñ noqtaları ve duşman radar stantsiyaları.
Saban ayınıñ 14-nde gece Ukrayina istihbaratınıñ arbiyleri "Keriç parom keçitiniñ" esas elementleri olğan "Slavânin" Rusiye demiryol paromı ve "Avangard" gemisine ücüm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
