FSB, "Ukrayina mahsus hızmetleriniñ vazifesi boyunca areket etken" Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) sakinini yaqalağanını bildirdi. Adam Rusiye Mudafaa nazirliginiñ yüksek rütbeli arbiy adamınıñ maşinasını patlatmağa niyetlengen edi. Oña qarşı "terroristik areketlerge azırlanuv" ve "devlet hainligi" maddelerine istinaden cinaiy dava açıldı.
İşğalli FSBniñ Qırım ve Sevastopoldaki (Aqyar) idaresiniñ matbuat hızmeti bildirdi, dep saban ayınıñ 12-nde RİA ''Novosti Krım'' Rusiye teşviqat haber agentligi bildirdi.
Federal hızmetiniñ versiyasına köre, tutulğan kişi Rusiye arbiy obyektleri ve askerleri aqqında malümat toplay edi, em de Telegram messencer vastasınen Rusiyede yasaq etilgen teşkilâtnen bağ tuttı.
Teşkilâtta bildirgenine köre, oña patlav aletleri, tertipke ketirüv talimatları ve maqsat malümatı berildi.
"O, RF Silâlı quvetleriniñ arbiy hızmetçisiniñ maşinasına öz başına yapılğan patlav cihazını qoyıp yoq etmek vazifesini aldı", — dep haberde aytıla.
Şimdiki vaqıtta Sevastopol (Aqyar) sakinini apiste tutalar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
