İşğal etilgen Qırımda Rusiye akimiyeti Merkeziy Asiya memleketlerinden kelgen işçi migrantlarnı şeerlerniñ abadanlaştıruvı ve qurucılıq işlerine celp ete. Olarnıñ çoqusınıñ vesiqaları yoq, şunıñ içün Rusiye quvetçileri tarafından basqığa oğraylar: sürgünlik telükesi altında olarnı Rusiye ordusınen añlaşmalar imzalamağa mecbur eteler.
Milliy muqavemet merkezi (MMM) bu aqqında bildire.
"Milliy muqavemet merkeziniñ malümatına köre, işçilerniñ çoqusı vesiqaları olmağan alda çalışa. Çoqusı allarda pasportları ve diger vesiqaları yolbaşçıları ya da aracılar tarafından alına, neticede insanlar iş bericilerge tam olaraq bağlı qalalar. İşlerde istismar etüvden ğayrı, migrantlar Rusiye quvetçileriniñ basqısına oğraylar. Akimiyet vekilleri ve arbiy komissarlıqlar, sürgünlik ya da vesiqa problemleri telükesini qullanıp, Merkeziy Asiyadan kelgenlerni Rusiye ordusı ile añlaşmalarnı imzalamağa zorlaylar", — dep añlatalar.
Milliy muqavemet merkeziniñ malümatına köre, Rusiye ordusına endi on biñlernen Merkeziy Asiya migrantları celp etilgen ola bile. Rusiyeliler qanunsız köçip kelgenlerni başta işğal etilgen topraqlarda ucuz işçi küçü olaraq, soñra ise ordularnı toldurmaq içün yedek olaraq qullanalar. Milliy muqavemet merkezi, ilhaq etilgen territoriyalarda, hususan işğal etilgen Mariupolda, böyle bir ameliyat aqqında bildirgen edi.
Qırımdaki prezident temsilciliginiñ malümatına köre, 2025 senesi arman ayı—ilk küz aylarında işğal etilgen yarımadada işğalci uquq qoruyıcılar tintüvler keçirdi — askerlik cedvelinde olmağanlarnı tapmaq içün qurucılıq meydançıqları, yataqhaneler, kvartiralar ve vaqtınca yaşav yerlerini teşkerdi.
2025 senesi ilk küz ayı 9-10 künleri işğal etilgen Kefede Rusiye quvetçileri "qanunsız migrantlar" ve arbiy cedvelde olmağan vatandaşlarnı teşkermege başladı. Tikinti meydançıqlarından birinde 12 insan teşkerildi, olarnıñ arasında üç Özbekistan vatandaşı bar — işğalci organlar olarğa qoşma talaplar qoydı, dep müessise bildirdi.
"İlk küz ayınıñ 10-na keçer gecesi Aqmescitteki (SimferopodakiRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) musafirhanelerden birinde işğalci quvetçiler, vesiqaları keçken bir ecnebiyni tapıp, bunı basqı içün sebep olaraq qullanalar. Hususan, Orta Asiya memleketlerinden kelgen ecnebiy vatandaşlar zarar köre bile. Olar içün vesiqalarnen bağlı yapma problemler yaratalar ve hızmet içün "çözüm" teklif eteler. Bu halqnıñ eñ zayıf gruppalarını cenk içün malzemeler olaraq qullanuvnıñ tsinik bir ameliyatıdır", — dep prezidentniñ temsilciliginde qayd eteler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
