Saban ayınıñ 6-na keçer gecesi mudafaa quvetleri işğal etilgen Qırımnıñ Kurortne rayonında Rusiye Federatsiyasınıñ 12-nci ayrı raketa brigadasınıñ "İskander" operativ-taktik raketa kompleksiniñ yerleşken rayonına ücüm ettiler.
Ukrayina Silâlı quvetleriniñ Baş ştabı Facebookta bu aqqında bildirdi.
"Rusiye istilâcısınıñ ücüm potansiyelini eksiltüv çerçivesinde Ukrayina Mudafaa quvetleriniñ 5-inci bölükleri saban ayınıñ 6-na keçer gecesi duşmannıñ arbiy obyektlerine bir sıra darbe endirdi. Mudafaa quvetleriniñ bölükleri Kurortne rayonında (Qırım Cumhuriyetiniñ VİET) 12-nci ayrı raketa brigadasınıñ "İskander" operativ-taktik raketa kompleksiniñ toplaşuv rayonına zarar ketirdi", — dep haberde aytıla.
Bundan ğayrı, Ukrayina Silâlı quvetleri Baş ştabınıñ malümatına köre, Qara deñizde "Sıvaş" qurulışına darbe endirildi ve Ka-27 Rusiye vertolötı yoq etildi.
"Qara deñizde "Sıvaş" öz-özüni kötergen qazma qurulışınıñ tehnikiy közetüv noqtasına ücüm etildi. Tedbirler devamında Ka-27 vertolötı yoq etildi. Zarar körgenlerniñ miqdarı ve diger neticeler aydınlatıla. Ava mudafaasınıñ vastaları, raketa kompleksleri, silâ anbarları ve duşman küçleriniñ toplaşuv rayonlarınıñ sistematik bozulması onıñ cenk areketlerini alıp barmaq ve ordularını gizlemek qabiliyetini bayağı eksilte", — dep Baş ştabta bildirdiler.
Hatırlatamız, UHH-daki Suspilne menbalarnıñ malümatına köre, qara qış ayınıñ 6-na keçer gecesi Qırımda eki "Pantsir-S2" raketa-topan kompleksleri, uçuv meydanında "Mohadjer-6" UUA, yük maşnasında ZU-23 zıddiyet qurulışı, eki yaqıt toldurıcı, "Forpost" UUAnıñ yerastı idare stantsiyası urulğan edi.
Читати ще
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
