2023 senesi Ancelika Demyanenko ve babası Oleksiy işğal etilgen Herson vilâyetinden Qırım üzerinden çıqmağa tırıştılar. Amma Çonğar kiriş noqtasında işğalciler olarnı qanunsız alda tuttılar. Bir buçuq yıl soñra, olarnı "casuslıq"ta qabaatlap, babasını 14 yılğa, qızını ise 10 yılğa mahküm etkenleri belli oldı. Şimdi Ancelikanı qanunsız olaraq Mordoviyanıñ Yavas köyündeki qadınlar müstemlekesine etap ettiler.
Kiçik aynıñ 16-nda "Tribunal. Qırım epizodı" uquq qorçalayıcı teşebbüsi Telegramda Mordoviyağa qanunsız etap aqqında haber berdi.
"Qırım kirişinde hırsızlanğan ve soñra casuslıqta qabaatlanğan Ancelika Demyanenko, Mordoviyanıñ Yavas köyündeki qadınlar müstemlekesine etap çerçivesinde keldi. Bu müstemleke, ekstremal şaraitte ağır işke mecbur etüv ve mahkümlerge nisbeten pek sert munasebetnen belli", — dep haberde qayd etildi.
Jurnalist taqiqatları merkeziniñ bildirgenine köre, Oleksiy Demyanenkonı qanunsız "tutıp alınğan" soñ "mahkeme"ge qadar Herson vilâyetiniñ Geniçesk rayonındaki Novotroyitske köy cemiyetiniñ Odradivka köyündeki köy medeniyet eviniñ mağazında yerleşken azaphanede'' tutqanlar. Demyanenkoğa bir qaç kere Rusiye FSBsiniñ vekilleri kelip, "er şey yahşı olacaq", dep işandırğan ediler.
"Onıñ qızı, FSB vekilleriniñ aytqanına köre, Geniçesk şeer cemiyetiniñ Çonğar köyünde — işğalli "Herson vilâyetindeki federal cezalandıruv hızmetiniñ idaresi"niñ "UFSİN taqiqat izolâtorında" tutula edi", — dep JTM yazdı.
Ancelika ve babası Oleksey Demyanenko 2023 senesi Qırımğa kirgende "Çonğar" kiriş noqtasında Rusiye quvetçileri tarafından tutuldı. Olar işğalden çıqmağa azırlana ediler, amma telefonlarında şübeli malümat tapılğanı aqqında bildirilgen "filtratsiya"dan keçkenler.
"Resmiy qabaatlavlar bir buçuq yıldan soñ belli oldı, baba malümat toplap, qızına yollağanı ve qızınıñ ise Ukrayina istihbaratına yollağanı aqqında teşviqatçılar bildirdiler. Rusiye mahkemesi Oleksiyni 14 yılğa, Ancelikanı ise on buçuq yılğa mahküm etti", — dep"Tribunal. Qırım epizodı" haber etti .
Leyhanıñ uquq qorçalayıcılarınıñ malümatına köre, Demyanenkonıñ qorantasından qaçırılğan ve qanunsız azatlıqtan marum etilgen şahıslarnıñ bir qaçı endi tapıldı.
"İşğal etilgen topraqtan Rusiye Federatsiyasınıñ toprağına vatandaşlarnıñ köçürüvi halqara gumanitar uquq tarafından yasaq etile ve cenk cinayeti sayıla. Mordoviyanıñ baş apisçi Vitaliy Perhoroviç ve mütemlekeniñ yolbaşçısı Vâçeslav Kimâev diger ukrayinalılarnıñ taqip etilmesine daa bir cinaiy epizod qoştılar", — dep teşebbüs qayd etti.
Bundan evel JTM, Odravikada qanunsız sürette azat etilgen insanlarnı taqip etken bir qaç Rusiye işğalcisini ve işbu azaphaneniñ işini temin etken yerli hadimlerni tanıp oldı.
"Bu, işğal etilgen köy medeniyet eviniñ müdiri, 27 yaşındaki Oleksandra Leona, köy gaulayteri Oleksandr Storçak, Kahovkadan duşmannen işdeşlikçi Oleksandr Zuev, em de Rusiye arbiy hızmetçileri Oleksandr Novogonskiy, Serğiy Çibisov, Maksim Puhov ve Yevheniy Zimin", — dep JTM yazdı.
Hatırlatamız ki, ruslar Mordoviyanıñ Yavas köyündeki müsyemlekede Herson vilâyetinden hırsızlanğan ve işğalciler tarafından "casuslıqtan mahküm etilgen" İrına Ğorobtsovanı qanunsız alda tutalar.
İrına Ğorobtsova aqqında ne bilemiz
İrina Gorobtsova — İT şirketinde testçi ve cemaat faalcisidir. Herson Rusiye tarafından işğal etilgen vaqıt o, yerli hastahanege yardım ete edi: uzaq rayonlardan ekimlerni alıp kete edi, aşayt malları, ilâc ve bağlayıcı malzemelerni qıdırıp ketire edi, ayrıca Herson vilâyetiniñ uzaq meskün yerlerindeki ağır hastalarğa ilâc ketire edi. Bundan da ğayrı, Hersonda Rusiye işğaline qarşı keçirilgen barışıq toplaşuvlarına barıp, içtimaiy ağlarda fotoresimlerini derc ete edi
2022 senesi mayısnıñ 13-nde, faalciniñ doğğan künü, Hersonda İrına Ğorobtsova ve ana-babasınıñ yaşağanı çoq daireli evge Rusiye arbiy hızmetlerinde belgisiz şahıslar keldiler, evini tintip, İrınanı alıp kettiler, ana-babasına onı sorğuğa alıp ketkenlerini ayttılar. Tintüv vaqtında faalciniñ noutbukı ve cep telefonı tutıp alındı. İrınanen bağ yoq edi, ve ana-babası Hersonda Rusiye işğalli memuriyetine muracaat etmege qarar aldı. Anda olarğa qızını Qırımğa alıp ketkenlerini bildirdiler.
Tintüv vaqtında faalciniñ kompyuteri ve cep telefonı tutıp alındı. İrına ile bağ yoq edi, ve ana-babası Hersonda Rusiye işğalli memuriyetine muracaat etmege qarar aldı. Anda olarğa qızı işğal etilgen Qırımğa alıp ketilgenini bildirdiler.
2024 senesi yazda Herson vilâyetiniñ işğalli makemesi faalcige "casuslıq" davasında 10 yıl ve 6 ay apis cezasını berdi.
Apiske alınmazdan evel, Rusiyeniñ istilâsından evel, oña aqıl anevrizması diagnozı qoyulğan edi, bu ise tibbiy yardım ve nezaretke muhtac olğan bir vaziyet.
2024 senesi ilk qış ayında İrınadan, alı fenalaşqanı ve tutulğan Simferopol SİZOsında tibbiy yardımnıñ yetmemezligi aqqında aytqanı aqqında mektüp keldi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
