81 yıl evel, 1945 senesi kiçik aynıñ 4-nde, Qırımda Yalta konferentsiyası başlandı. Ekinci cian cenkinde ğalebe qazanğan devletlerniñ liderleri, cenkten soñ dünya tertibini belgilemek içün toplaştılar.
Yalta konferentsiyasınıñ ukrayin bağlamı sıq-sıq közden qaçırıla, lâkin o müim edi, dep prezidentniñ Qırımdaki temsilciligi yazdı.
"1945 senesi Ukrayina SSC cenk neticesinde insan ve maddiy zarar kördi. Yaltada qabul etilgen qararlar, Ukrayinanıñ sovet tesir alanına kirsetilmesini, siyasiy kelecegini mustaqil olaraq saylamaq aqqından marum qaldırdı. Aynı zamanda konferentsiya Ukrayina SSCniñ Birleşken Milletler Teşkilâtında ayrı aza olaraq iştirak etmesine yol açtı", — dep haberde qayd etildi.
Toplaşuvda Avropanıñ yañı sıñırları belgilene edi, natsist Almaniyasınıñ teslim olma şartları, halqara havfsızlıq mehanizmleri, cenk cinayetleri içün tazminat muzakere etile edi.
"Qırım içün Yalta konferentsiyası evel olğan facialar arfesinde keçti. 1944 senesi mayıs ayında sovet akimiyeti qırımtatar halqını sürgün etti — soñra genotsid olaraq tanılğan cinayet. Konferentsiya keçirilgen vaqıt Qırımnıñ tamır halqı öz vatanından sürgün etilgen edi", — dep temsilcilik yazdı.
Amma, temsilcilikniñ qayd etkenine köre, o vaqıt sürgünlik halqara muzakerelerniñ mevzusı olmadı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
