"Altıncı Bağçasaray gruppası" davasınıñ mabüsi Rustem Osmanovnıñ evinde keçirilgen tintüvde iştirak etken şaat kiçik aynıñ 3-nde Rusiyeniñ Cenübiy bölgeniñ arbiy mahkemesiniñ toplaşuvında sorğuğa çekildi. İmayeci taraf şaatnıñ ifadelerini şübe altına qoya ve mahkemege olarnıñ doğru olmağanını köstere.
"Qırım birdemligi", advokat Emil Kurbedinovnıñ malümatına esaslanıp, bunı bildirdi.
"Bizler, şaatlarnıñ bütün tintüv esnasını bir qaç saat devamında nezaret etkeni, aynı vaqıtta bütün iştirakçilerni nezaret etkeni ve bütün binalarnı nezaret etkeni aqqında şübelendirmek imkânımız bar. Müvekkillerimizniñ aytqanına köre, evleri tintilgende, olarğa ait olmağan edebiyat tapıldı. Bundan da ğayrı, olar, Rusiyede yasaq etilgen bu edebiyat olarğa qoyuldı, dep işanalar. Tahqiqat tedbirleri vaqtında — evel ya da soñ — bunı mahkeme daa soñra belgilemeli", — dep advokat Kurbedinov ayttı.
Dava boyunca kelecek mahkeme oturışı kiçik aynıñ 24-nde Kıyiv vaqtına köre saat 9:00-da olacaq.
Hatırlatamız ki, 2024 senesi saban ayınıñ 5-nde qırımtatarlar Memet Lümanov, Aziz Azizov, Mustafa Abduramanov ve Rustem Osmanov tutuldı. Olarnı Hizb ut-Tahrir siyasiy teşkilâtında iştirak etüvde qabaatlaylar.
2025 senesi ilk qış ayında Rusiye mahkemesi qırımtatar siyasiy mabüsleriniñ advokatlarınıñ tevqif tedbirini ev apsine deñiştirmeknen bağlı delillerini körmemezlikke urdı ve SİZOda tutulmasını 2026 senesi çiçek ayınıñ 7-ne qadar uzattı.
"Hizb ut-Tahrir davası"nıñ altıncı Bağçasaray gruppasınıñ mabüsleri aqqında ne bilemiz
Saban ayınıñ 5-nde saba maalinde Bağçasaray ve Canköy rayonlarında uquq qorçalayıcılar 10 qırımtatarnıñ evinde tintüv keçirdiler. Aynı o künü makeme olardan dörtü - qırımtatar faalcileri Memet Lümanov, Aziz Azizov, Rustem Osmanov ve Mustafa Abduramanov içün tevqif tedbirini sayladı. Olarnı SİZOğa yolladılar.
Daa soñra makeme Canköy ve Canköy rayonınıñ tutulğan sakinlerini SİZOğa yolladı: Enver Halillayev, Nariman Ametov, Ali Mamutov, Cadra köy camisiniñ imamı Vahid Mustafayev ve Arsen Kaşka.
Sabıq imam Remzi Kurtnezirovnıñ hastalıqları sebebinden ev apsine alındı. Tutulğan on kişiniñ episi Rusiyede yasaq etilgen Hizb ut-Tahrir islâm firqasınıñ iştirakçisi ola. Tutulğanlarnıñ çoqusı, çoq balalı qorantalarnıñ babaları ola.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
